Kurti: Mitrovica është problem edhe kombëtar

Lëvizja Vetëvendosje edhe me pjesëmarrjen në institucione nuk
është shndërruar në parti politike sikur se ato që i kemi parë të hynë e
të dalin nga qeveritë e pasluftës, sepse kemi dëshmuar që për dallim
prej partive në Kosovë, që përgjithësisht janë struktura pasive dhe
jopolitike, ne jemi një organizatë aktive politike. Kështu tha lideri i
kësaj lëvizje, Albin Kurti, në mbledhjen zgjedhore të Vetëvendosjes në
Mitrovicë.“Jemi një Lëvizje e cila i ka të palëvizshme
qëndrimet e parimet, organizatë shumë e gjallë e aktive, gjë që është e
kundërt me partitë politike, të cilat qëndrimet dhe parimet i kanë shumë
fleksibile e të lëvizshme, ndërsa organizatën e kanë pasive dhe të
plogësht. Pra në këtë kuptim ne si Vetëvendosje jemi e kundërta e
partive tradicionalë ne Kosovë, sepse gjallëria jonë është tek
organizata, ndërsa këmbëngulësia jonë është te parimet dhe qëndrimet e
saktësisht e kundërta është tek partitë politike”.
“Nga çka kemi kaluar në Vetëvendosje deri më tash, ne jemi kalitur,
jemi përgatitur për sfidat të cilat na presin e për të cilat jam i
sigurt që edhe nëse janë më të mëdha se sa ato që i kemi kaluar sërish
do t’i tejkalojmë më kollaj se sa ato që i kemi kaluar për shkak se edhe
jemi më të përgatitur, por edhe organizata jonë është më e fortë se
asnjëherë më parë”.
“Ideve tona të fuqishme, kritikës tonë parimore, po ia bashkangjesim
një organizatë të fuqishme dhe kombinimi fitues është pikërisht ky.
Është e rëndësishme që Lëvizja Vetëvendosje të jetë në veçanti e
fuqishme në Mitrovicë, por në anën tjetër gjithmonë duke pasur parasysh
se Mitrovica nuk është, dhe nuk duhet të jetë asnjëherë problem i
mitrovicasve, apo vetëm i mitrovicasve, por problem i gjithë Kosovës dhe
i kombit shqiptar”, ka thënë Kurti. /Telegrafi/