Kurti: Alternativa ndaj vjedhjes është: Mos vjedh!

Lëvizja Vetëvendosje ka njoftuar se të mërkurën do të organizojë
protestë paqësore me moton “kundër hajnisë”. “Në orën 12:00 do të
nisemi nga Biblioteka Kombëtare dhe marshuta jonë do të jetë nëpër
rrugën ‘Nëna Terezë’ e deri te ndërtesa e Qeverisë. Aty do t’i kemi disa
fjalime”, tha në një konferencë për media, lideri i kësaj lëvizje,
Albin Kurti.Protestuesit, tha Kurti, do t’i kenë xhepat e
nxjerrë jashtë duke paraqitur kështu simbolikisht varfërinë e qytetarëve
për shkak të, siç tha ai, hajnisë së pushtetit. Mjerimi social në
Kosovë, sipas tij, nuk është fatkeqësi natyrore, por dashakeqësi
politike.
“Janë tri lloje kryesore të hajnisë: manipulimi me tenderët që u
jipen zakonisht e kryesisht biznesmenëve që janë miq të Qeverisë; shitja
e ndërmarrjeve publike me këtë privatizim të egër që ua mbush xhepat
ministrave; dhe, marrëveshjet e paralajmëruara me Serbinë që na e
vjedhin territorin e Kosovës”.
“Siç e dini, kjo qeveri operon tashmë me buxhet të paligjshëm,
planifikon t’i shesë lirë dhe shpejt PTK-në, KEK-un e Trepçën dhe mendon
t’i bëjë 6 marrëveshje me Serbinë me ç’rast jo vetëm që qytetarët dhe
deputetët nuk dinë se çka përmbajnë ato, por edhe platforma e bisedimeve
nuk i është dhënë as kryesisë së Kuvendit dhe as kryetarit të
Kuvendit”, tha Kurti.
“Në protestë do të ketë edhe policë, pasi që edhe policët janë kundër
hajnisë. Ne e kemi njoftuar dje pasdite policinë e Kosovës me njoftim
zyrtar me ç’rast ua kemi shpjeguar itinerarin e marshutës protestuese
prej vendgrumbullimit e deri te vendi ku përfundon marshi”, tha lideri i
Lëvizjes Vetëvendosje.
I pyetur të komentojë deklaratën e zëvendëskryeministrit Hajredin
Kuci, i cili e ka ftuar Lëvizjen Vetëvendosje që të lërë mënjanë
ofendimet dhe të ofrojë alternativa konkrete, Kurti është përgjigjur:
“Ne e kemi dhënë alternativën tonë në programin tonë politik. Sigurisht
që alternativa ndaj vjedhjes është: MOS VJEDH”.
Këtë protestë sipas Lëvizjes Vetëvendosje e kanë mbështetur dhe do të
marrin pjesë shumë organizata si p.sh.: Rrjeti i Grupeve të Grave të
Kosovës, Sindikata e Punëtorëve të PTK-së, Sindikata e Punëtorëve të
Fabrikës së Amortizatorëve, Sindikata e Punëtorëve të Sharrcemit,
Sindikata e Bujqve të Kosovës si dhe shumë organizata lokale nga komuna
të ndryshme të Kosovës. /Telegrafi/