Edhe ndarja e Kosovës është e mundshme

Bashkësia ndërkombëtare është duke shqyrtuar tri opsione si
rezultat i mundshëm që mund të del nga dialogu midis Prishtinës dhe
Beografit – ndarja e Kosovës, status quo dhe zbatimi i modelit të dy
Gjermanive, ku Beogradi do të njihte Kosovën, ndërsa Prishtina nuk do të
merrte vend në OKB.“Ndarja nuk hedhet poshtë si zgjidhje e
mundshme, por deri te ndarje duhet patjetër të bëhet nëpërmjet
marrëveshjes dhe dialogut”, ka thënë një burim i Qeverisë së Serbisë për
gazetën Blic. Por, sipas këtij burimi, tash për tash, kjo çështje është
ende larg të arrihet.
Qëndrimi zyrtar i Serbisë në negociatat me Prishtinën janë në
përputhje me Kushtetutën e Serbisë dhe qëndrimin për mosnjohje të
Kosovës, por Beogradi prêt që në kuadër të dialogut të shqyrtojë edhe
çështjen e statusit, para së gjithash statusin e ardhshëm të veriut të
Kosovës.
Hans Ola Urstad, këshilltar në Ministrinë e Jashtme të Norvegjisë,
për Blic ka thënë se ideja rreth ndarjes së Kosovës ekziston një kohë të
gjatë te bashkësia ndërkombëtare.
“Është e nevojshme të arrihet marrëveshje që do të kënaqte të dy
palët. Nëse Prishtina dhe Beogradi merren vesh, kjo do të ishte e
pranueshme në BE. Nuk mund të paramendoj për çfarë arsye evropianët nuk
do të përkrahnin diçka që arrihet midis dy palëve”, ka thënë Urstad, që
dikur ka qenë ambasador i OSBE-së në Serbi.
Sipas tij, ndarje e Kosovës mund të siguronte stabilitet dhe paqe në rajon. /Telegrafi/