Thaçi uron Erdoganin për fitoren e zgjedhjeve

Kryeministri i Republikës së Kosovës, Hashim Thaçi i ka dërguar
një telegram urimi homologut të tij, kryeministrit të Republikës së
Turqisë, Recep Tayyip Erdogan, me rastin e fitores në zgjedhjet
parlamentare në Turqi.“Më lejoni që në emër të Qeverisë së
Republikës së Kosovës, t’iu shpreh urimet më të përzemërta me rastin e
fitores Tuaj në zgjedhjet parlamentare në Republikën e Turqisë.
Përkushtimi juaj për të fuqizuar edhe më tej zhvillimin e hovshëm të
Republikës së Turqisë, si dhe fryma e fqinjësisë së mirë, e paqes,
stabilitetit dhe bashkëpunimit të të gjitha vendeve të rajonit, që
identifikohet me konceptin tuaj, është një garancë substanciale e
suksesit të vazhdueshëm të Turqisë”.
“Qeveria e Republikës së Kosovës rithekson angazhimin për forcimin e
marrëdhënieve të shkëlqyera me qeverinë e drejtuar nga ju, në interes të
përbashkët të të dy vendeve tona. Republika e Kosovës është dhe do të
vazhdojë të jetë mirënjohëse për mbështetjen e gjithanshme që Republika e
Turqisë i ka dhënë Kosovës në momentet më vendimtare”, thuhet në
telegram. /Telegrafi/