Suedia premton mbështetje në kuadër të KFOR-it

Shefi i Shtabit të Përgjithshëm të Ushtrisë Suedeze, gjenerali
Berndt Grundevik gjatë vizitës në Shtabin e Përgjithshëm të KFOR-it në
Prishtinë tha se është i kënaqur me situatën e përgjithshme dhe të qetë
të sigurisë në Kosovë. Ai konfirmoi se Suedia do të vazhdojë të
mbështesë KFOR-in. Shefi i Shtabit të Përgjithshëm të
Ushtrisë Suedeze, gjenerali Berndt Grundevik e vizitoi Shtabin e
Përgjithshëm të KFOR-it në Prishtinë dhe shkëmbeu informata dhe mendime
me zëvendëskomandantin e KFOR-it, gjeneralin Marco Serronha lidhur me
situatën e sigurisë në Kosovë si dhe zhvillimet politike në rajon.
Gjenerali Grundevik theksoi se përkundër faktit që ka potencial të
dhunës në veri të Kosovës, prezenca e KFOR-it atje i kontribuon
parandalimit të incidenteve madhore.
Gjenerali Grundevik e konfirmoi rëndësinë e misionit dhe theksoi që
Suedia aktualisht do të vazhdojë të mbështesë KFOR-in dhe do të vazhdojë
të marrë përsipër detyrën shumë të rëndësishme për të lidhur misionin
me popullatën vendore.
“Ekipet ndërlidhëse dhe monitoruese (LMT-të) suedeze së bashku me
ekipet e kombeve të tjera janë më se të rëndësishme për suksesin e
KFOR-it. LMT-të janë ‘imazh’ i KFOR-it, meqë bisedojnë me popullatën në
rrugë, me kryetarë komunash, me mësimdhënës si dhe përfaqësues të
grupeve shoqërore dhe fetare, duke iu ofruar kështu ndjenjën e sigurisë,
stabilitetit si dhe prezencës ndërkombëtare në rajon”, tha ai.
Që nga muaji gusht i vitit 1999, Forcat e Armatosura të Suedisë kanë
qenë pjesë e KFOR-it. Gjatë 12 vjetëve të fundit, me mijëra ushtarë
suedezë kanë shërbyer në Kosovë dhe kanë dhënë kontributin e tyre për
zhvillimet paqësore në rajon. Tani, suedezët po e udhëheqin Detashmentin
e Përbashkët Rajonal Qendër dhe një nga detyrat e tyre kryesore
operacionale është të ofrojnë mbështetje për LMT-të në Prishtinë dhe në
Graçanicë.
Aktualisht, gjithsej 70 ushtarë suedezë po shërbejnë në Kosovë, në kuadër të trupave të KFOR-it. /Telegrafi/