Ministri Hoxhaj viziton Jordaninë

Pas vizitave në Republikën Federale të Gjermanisë dhe në Bosnje e
Hercegovinë, shefi i ministri i Punëve të Jashtme i Kosovës, Enver
Hoxhaj, do të qëndrojë në vizitë zyrtare në Mbretërinë e Jordanisë, me
ftesë të homologut jordanez, Nasser Judeh.Gjatë vizitës në
Amman, ministri Hoxhaj do të zhvillojë takime me ministrin e Punëve të
Jashtme të Mbretërisë së Jordanisë, me zyrtarë të tjerë të lartë të
këtij shteti, si dhe me përfaqësues diplomatikë të vendeve të tjera të
akredituar në Jordani.
Ministri Hoxhaj do të njoftojë zyrtarët e lartë jordanezë dhe të
shteteve të tjera për progresin e arritur në Kosovë që nga shpallja e
pavarësisë e deri më tash, si dhe me proceset aktuale nëpër të cilat po
kalon Kosova, njoftoi Zyra e Informimit e Ministrisë së Puënve të
Jashtme.
Shefi i diplomacisë kosovare do të rikonfirmojë përkushtimin e
institucioneve dhe popullit të Kosovës për të forcuar lidhjet e
shumanshme me popujt e vendeve arabe, përfshirë Mbretërinë e Jordanisë.
Gjatë takimeve të Hoxhajt me udhëheqësit e lartë jordanezë do të
shqyrtohen edhe format konkrete të bashkëpunimit ndërmjet dy vendeve,
duke përfshirë lidhjen e marrëveshjeve të ndryshme mes institucioneve të
të dyja shteteve.
Vizita zyrtare e ministrit Hoxhaj në Jordani, pritet të ketë efekte
të rëndësishme në forcimin e bashkëpunimit bilateral ndërmjet dy
shteteve, si dhe në forcimin e subjektivitetit të Kosovës në arenën
ndërkombëtare, duke pasur parasysh rolin e rëndësishëm të këtij shteti
në proceset politike dhe diplomatike në botën arabe dhe më gjerë. /Telegrafi/