Sfidat e shtet-ndërtimit janë të mëdha

“Sfidat e shtet-ndërtimit dhe e ardhmja e Republikës së Kosovës”
janë diskutuar të mërkurën në Prishtinë nga akademikë e
doktorë-shkencash të fushave të ndryshme. Panelistët vlerësuan se
sovraniteti, lobimi për njohje, ekonomia, korrupsioni, janë disa nga
sfidat ku institucionet kanë çaluar në vazhdimësi.Në
aktivitetin shkencor të organizuar nga Akademia e Shkencave dhe e Arteve
e Kosovës, akademik Esat Stavileci ka thënë se në tri vjet pas
shpalljes së pavarësisë Kosova ka dëshmuar se vështirësitë në bërjen e
shtetit të Kosovës janë të mëdha.
“Nuk ka fije dyshimi se vështirësitë më të mëdha janë pasojë e
ushtrimit të kufizuar të sovranitetit. Kosova është e kufizuar në një
numër dimensionesh, që nga Plani i Ahtisaarit, që është bërë pjesë
përbërëse e Kushtetutës së Kosovës, madje duke ia marrë asaj primatin e
të qenit akti më i lart juridik”, ka thënë Stavileci.
Ndërsa në prezantimin e tij, zëvendësministri i Punëve të Jashtme,
Ibrahim Gashi, ka folur për sfidat e Kosovës në procesin e njohjes së
shtetësisë dhe ka thënë se vakuumi institucional ka ndikuar në ndaljen e
njohjeve.
Përveç kësaj është diskutuar edhe për sfidat tjera, për ekonominë,
demokratizimin e institucioneve dhe në veçanti mungesën e vullnetit
politik për të luftuar korrupsionin, për të cilin qytetarët kanë
perceptimin se është i shtrirë në secilin institucion qendrorë e lokal. /Telegrafi/