Vetëvendosje: Kujdes xhepat! Qeveria afër!

Lëvizja Vetëvendosje realizoi të enjten një aksionin simbolik,
me ç’rast shpërndanë fletushka dhe ftuan qytetarët për në protestën
kundër hajnisë që do të mbahet më 22 qershor në Prishtinë. Aktivistët
e lëvizjes Vetëvendosje vendosën përpara ndërtesës së qeverisë dhe
përpara ministrive të tjera tabelat e qarkullimit rrugor me shënimet:
Kujdes xhepat! Ministria afër! dhe Kujdes xhepat! Qeveria afër!
Aktivisti Kreshnik Ahmeti tha se në Kosovën që po zhytet në mjerim
social, janë shtuar edhe vjedhjet delikuente, të cilat sipas tij vijnë
si pasojë e varfërisë që e ka pllakosur Kosovën, por edhe si pasojë e
degradimit të sistemit të edukimit.
“...Për dallim nga kjo, në ndërtesën përballë, atë të Qeverisë së
Kosovës, ndodh vjedhja në mënyrë të organizuar dhe në shifra që arrijnë
dhjetëra miliona euro. Këto miliona janë nga taksat e qytetarëve të
Kosovës. Pra, hajnia e dytë është shkaktare së parës. Kjo qeveri, po
vjedh nga qytetari i Kosovës, te tashmen dhe te ardhmen, duke
privatizuar ndërmarrjet të cilat janë pronë e të gjithëve, pa u pyetur
askush”, tha Ahmeti.
Ai tha qeveria vjedh nga qytetari i Kosovës duke trefishuar çmimin e
energjisë elektrike, duke lejuar vërshimin e tregut tonë nga produktet e
Serbisë, pa u brengosur për gjendjen e prodhuesit vendor.
“Madje kjo qeveri, vjedh nga bashkatdhetarët kur merr prej tyre taksë
prej 50 euro sa herë vijnë në Kosovë, duke e konfirmuar kështu
mosmirënjohjen ndaj tyre. Leximi i listës së plotë të vjedhjeve nga kjo
qeverisje merr kohë, e secili prej jush e di dhe e vuan. Kështu që
listën e hajnisë dhe autorët e saj do t’i kundërshtojmë të gjithë bashkë
me 22 qershor, ora 12:00 të Biblioteka Kombëtare”, u shpreh Ahmeti.
/Telegrafi/