Zannier largohet nga Kosova?

Shefi i UNMIK-ut, italiani Lamberto Zannier, duke se është duke i
numëruar ditë e fundit në Kosovë. Postin e numrit një të misionit
ndërkombëtar funksional vetëm në veri, ai ka gjasa ta mbajë vetëm deri
në fund të këtij muaji, sepse është në listën e ngushtë për sekretar të
përgjithshëm të Organizatës për Siguri dhe Bashkëpunim Evropian (OSBE)
dhe i ka të gjitha gjasat që të fitojë garën. Zannier, i
cili në Kosovë ka ardhur menjëherë pas shpalljes së pavarësisë, e ka
konfirmuar për gazetën Zëri mundësinë e largimit të tij nga UNMIK-u.
Ai ka pohuar se pozitën e re ende nuk e ka fituar, edhe pse pranon se
emri i tij është propozuar për sekretar të përgjithshëm të OSBE-së nga
kryesia e kësaj organizate në Vjenë.
“Procedurat janë duke vazhduar dhe pritet një propozim formal nga
OSBE”, ka thënë Zannier, duke shtuar se është intervistuar në mars të
këtij viti, ndërsa brenda pak ditësh pritet të dihet emri i fituesit.
Zannier aktualisht gjendet në Bruksel, ndërsa duket se nuk brengoset
fare nëse do ta braktisë punën në UNMIK, respektivisht në Kosovë.
“Të gjithë përfaqësuesit e huaj njëherë duhet të largohen nga Kosova.
Edhe unë duhet të largohem, tani apo një herë tjetër. Por, të tërën do
ta kuptojmë javën tjetër”, ka thënë Zannier.
Diplomati italian, i cili mandatin prej stafit të UNMIK-ut e ka nisur
më 13 qershor të vitit 2008, thotë se për periudhën trevjeçare kanë
mbetur probleme të pazgjidhura në Kosovës, ani pse në disa çështje,
sipas tij, ka pasur progres. /Telegrafi/