Isa Mustafa, më 7 korrik në bankën e të pandehurit

Kryetari i Komunës së Prishtinës, Isa Mustafa, është i obliguar
që më 7 korrik të paraqitet në Gjykatën Komunale të Prishtinës në
shqyrtimin kryesor, si i pandehur për vepër penale “shpifje publike ndaj
biznesmenit” Ukshin Menxhiqi, pronar i pompës së karburanteve “Bingo
Benz”, në lagjen “Tophane” të kryeqytetit, afër Xhamisë së Llapit. Kjo
pompë, për punën e së cilës pronari kishte pasur licencën nga Ministria
e Tregtisë dhe e Industrisë, ndërsa jo edhe nga organet komunale të
Prishtinës, ishte rrënuar me urdhër të Komunës. Ndërkaq, pronari kishte
filluar të ankohej, duke dhënë edhe deklarata se rrënimi i pompës i
është bërë për inate personale nga fqinji i tij, Mustafa, siç qe
shprehur ai, pa pasur bazë ligjore.
Më pas, kryetari i Prishtinës, Isa Mustafa, publikisht kishte
deklaruar në medie se dyshonte që pronari i “Bingo Benzit”, Ukshin
Menxhiqi, kishte korruptuar dikë në Ministrinë e Tregtisë për t’u
pajisur me licencë të punës. Menjëherë pas kësaj deklarate, pronari i
kompanisë kishte ngritur padi private ndaj kryetarit të Komunës, Isa
Mustafa, duke e akuzuar atë për shpifje, gjë që ka ndikuar që procesi të
vijë deri te shqyrtimi kryesor në Gjykatën Komunale të Prishtinës, për
çfarë palët janë të obliguara të paraqiten personalisht, më 7 korrik të
sivjetmë, shkruan Koha Ditore.
Kjo është konfirmuar nëpërmjet thirrjes që gjykata ia ka lëshuar
paditësit Menxhiqi, por jo edhe nga Komuna e Prishtinës. Derisa
këshilltarët e kryetarit të Prishtinës, Isa Mustafa, nuk kanë mundur të
kontaktohen pas orarit të punës, zëdhënësi i Komunës së Prishtinës,
Muhamet Gashi, i ka thënë gazetës se nuk e ka një informacion të tillë
dhe se nuk ka mundësi ta konfirmojë atë. /Telegrafi/