Task Forca e BE-së fillon në korrik

Task Forca e BE-së, që do të merret me hetimin e pohimeve të senatorit zviceran Dick Marty për tregtinë të organeve nga ish-pjesëtarë të UÇK-së, është në formim e sipër, derisa në një masë pritet të jetë operacionale deri në fund të muajit korrik.

Kështu kanë deklaruar zyrtarë për media në EULEX, të cilët kanë thënë se aktualisht stafi që do të punojë në këtë Task Forcë është në fazën e rekrutimit. Sipas EULEX-it, për proceset e mundshme gjyqësore pas hetimeve, juridiksionin e ka Gjykata e Qarkut në Prishtinë, shkruan Express.

Ndërkaq, Serbia po vazhdon kërkesat që hetimet të kryhen nën mandatin e Këshillit të Sigurimit të OKB-së, edhe pse shtetet perëndimore po e refuzojnë

Por, në EULEX nuk kanë dhënë një përgjigje nëse emrat e njerëzve që do të punojnë në Taskë Forcë do të bëhen të ditur për opinionin.

“Task Forca do të udhëhiqet nga një prokuror dhe do të përbëhet nga hetues dhe zyrtarë ligjorë. Për momentin është duke u rekrutuar stafi”, ka thënë Blerim Krasniqi, zëdhënës i EULEX-it.

Po ashtu nuk ka pasur përgjigje nëse senatori zviceran Dick Marty, i cili ka hartuar raportin në emër të Këshillit të Europës, do të bashkëpunojë me Taskë Forcën e BE-së pasi një gjë të tillë ka refuzuar ta bëjë me EULEX-in.

Raporti i Martyt përfshin udhëheqës të lartë të UÇK’së në tregti të organeve në Kosovë, përfshirë edhe Kryeministrin aktual Hashim Thaçi. Por, këto akuza janë hedhur poshtë nga Kryeministri Thaçi, derisa ai ka shfaqur gatishmërinë për bashkëpunim me Taskë Forcën e BE’së.

Lajmi për krijimin e Taskë Forcës ishte bërë i ditur para disa javësh nga Zyra e Baroneshës Ashton. Në kuadër të zyrës së kryediplomates së BE’së funksionojnë të gjitha misionet e unionit nëpër botë përfshirë edhe EULEX’in.

E në rast të inicimit të ndonjë procesi gjyqësor pas hetimeve të Taskë Forcës, sipas EULEX-it, për një gjë të tillë juridiksionin e ka Gjykata e Qarkut në Prishtinë.

Në anën tjetër, Serbia është duke insistuar që hetimet për këtë rast të fillojnë me mandatin e Këshillit të Sigurimit të Organizatës së Kombeve të Bashkuara. /Telegrafi/