EULEX-i krijon Task Force për veriun

EULEX-i ka vendosur t’u përgjigjet sfidave në veri me një grup të veçantë njerëzish që do të merren vetëm me atë pjesë. Misioni i BE-së për sundimin e ligjit në Kosovë, ka krijuar një Task Force të veçantë për veriun.
Task Forca është kundër krimit të organizuar dhe përbëhet nga policia, drejtësia dhe doganat e EULEX-it, shkruan Koha Ditore.
Krijimin e Task Forcës, kreu i Misionit Xavier Bout de Marnhac ka zgjedhur që t’ia prezantojnë Këshillit të Sigurimit të OKB-së si shembull të përkushtimit të misionit në atë pjesë të Kosovës.
Në raportet e rregullta për Kosovën që sekretari i OKB-së, Ban Ki-moon i bën Këshillit të Sigurimit, raportohet edhe për punën e EULEX-it. Në raportin për periudhën 15 janar-19 prill 2011, Marnhac shkruan se EULEX-i ka vazhduar që ta zbatojë mandatin e vet, duke i mbështetur institucionet e Kosovës dhe duke përdorur edhe kompetencat ekzekutive aty ku është vlerësuar si e nevojshme.
“Qëllimi i misionit për të forcuar sundimin e ligjit në veri është shënuar nga disa përpjekje të rëndësishme, përfshirë edhe zbarkimin e një Task Force kundër krimit të organizuar dhe me një dukshmëri më të madhe të misionit në atë pjesë. Disa operacione policore dhe gjyqësore kundër krimeve të luftës, korrupsionit dhe krimit të organizuar janë kryer”, shkruan Marnhac.
Në pjesën e raportit ku flitet për korrupsionin, EULEX-i shkruan se vazhdojnë hetimet, në dy rastet e mëdha, atë të guvernatorit dhe të MTPT-së. Rasti Bllaca dhe rastet e krimeve të luftës janë aktivitete tjera që i përmend misioni.
Për herë të parë, shefi i EULEX-it zbulon dyshimet për akuzat e Dick Martyt, në bazë të të cilave misioni ka nisur një hetim preliminar. Sipas tij, prej kur janë bërë publike akuzat, EULEX-i vazhdimisht ka pasur vëmendjen te çështja dhe ka deklaruar se ka kapacitete, ekspertizën, juridiksionin e duhur dhe përgjegjësinë për të bërë hetimin. /Telegrafi/