Edhe një strategji për veriun

Dështimi i hershëm i strategjisë për integrimin e veriut, i proklamuar me shumë entuziazëm para më shumë se një viti nga Zyra Civile Ndërkombëtare dhe Qeveria e Kosovës, ka shtyrë faktorët vendimmarrës ndërkombëtarë e vendorë në gjetjen e një zgjidhjeje për integrimin e pjesës më problematike të vendit- veriut të Kosovës.
Hartimi i një plani të ri veprues është parë si e vetmja zgjidhje që do të mund ta fuste edhe veriun e Kosovës nën autoritetin e Prishtinës zyrtare. Burime ndërkombëtare të “Zërit” kanë bërë të ditur se vendet e Quintit janë duke shqyrtuar mundësinë e ndërrimit të strategjisë për veriun me një tjetër që do ishte më funksionale.

“Vendet e Quintit në Kosovë kohët e fundit kanë diskutuar planin strategjik për integrimin e veriut, duke lënë mundësinë e ndryshimit të tij, pasi që deri më tani nuk është arritur ndonjë sukses”, thotë ky ndërkombëtar në kushte anonimiteti. Sipas tij, disa herë është kritikuar edhe ICO për dështimin e strategjisë.

Ai tha se plani i ri që mund të hartohet shumë shpejt për integrimin e asaj pjese, nuk është ende i qartësuar se çfarë do të përmbajë, por ditët në vijim do të ketë takime tjera ku dhe do të shqyrtohen mundësitë.

Në anën tjetër, zyrtarë të ICO-së në Prishtinë, duke mos dashur të komentojnë mundësinë e një plani të ri veprimi për veriun, vazhdojnë të mbështeten në strategjinë aktuale.

Andy McGuffie, zëdhënës në ICO, thotë se kjo zyrë është duke punuar ngushtë me Qeverinë e Kosovës për të vazhduar decentralizimin e mëtejmë.

Ai thotë se edhe ekipi përgatitor për krijimin e komunës së Mitrovicës së veriut është duke punuar vazhdimisht në themelimin e asaj komune. /Telegrafi/