Nuk pranohen dokumentet që i lëshon Serbia

Autoritetet kosovare kanë mohuar mundësinë që të pranojnë ndonjë
marrëveshje në dialogun me Serbinë, me të cilën do të legalizoheshin
dokumentet e udhëtimit që Beogradi lëshon për serbët e Kosovës.Ministri
i Punëve të Brendshme, Bajram Rexhepi, ka thënë se të tilla dokumente
nuk do të konsiderohen si legale nga autoritetet e rendit. Sipas tij, do
të jetë i papranueshëm secili propozim që është jashtë standardeve që
shtetet evropiane aplikojnë për lëvizjen e lirë.
“Absolutisht, dokumentet që i lëshon Serbia për qytetarët tanë nuk
mund të pranohen si legale, patentë shoferi ose diçka të tilla, dhe e
dini se ka pasur raste që janë konfiskuar. Mirëpo, për çka do që arrihet
me reciprocitet, ne jemi të hapur”, ka thënë Rexhepi për Kohën Ditore.
Pakoja e marrëveshjes së lëvizjes së lirë në bisedimet në mes të
Kosovës dhe Serbisë pritet të arrihet në mesin e muajit korrik, në
takimin e radhës të delegacionit të Kosovës dhe atij të Serbisë, së
bashku me shtatë marrëveshje që do të nënshkruhen.
Burime në Beograd të afërta me bisedimet kanë bërë të ditur një ditë
më parë se kjo pritet të ndodhë së shpejti me pranimin e ndërsjellë të
dokumenteve, në kuadër të diskutimeve për lëvizjen e lirë. /Telegrafi/