“Die Welt” lavdëron ministrin Hoxhaj

Gazeta prestigjioze gjermane “Die Welt” ka botuar një bisedë me
ministrin e Punëve të Jashtme të Republikës së Kosovës, Enver Hoxhaj.
Në këtë artikull të titulluar “Kosova kërkon t’i bashkëngjitet
Modernes”, përshkruhet gjendja në Kosovë sipas pikëpamjeve të autorëve
Daniel-Dylan Böhmer dhe Michael Stürmer, ndërsa jepen citate të
deklaratave të ministrit Hoxhaj, lidhur me zhvillimet e përshkruara.Fillimisht
në artikull flitet për biografinë dhe bëhet një përshkrim i profilit të
Ministrit Hoxhaj. “Gjatë vizitës së tij në Berlin para disa ditësh,
duke shmangur formulat e një gjuhe plastike, tek ai vihej re
shkencëtari, i cili zotëron analizën dhe historiani pragmatist që kërkon
zgjidhjen. Por, vihet re po ashtu që ministri Hoxhaj zotëron edhe kodin
diplomatik, duke ditur të theksojë aksentët e nevojshëm përballë
pozitës së vështirë në të cilën gjendet vendi i tij që ende vazhdon
rrugën drejt Evropës”, thuhet në artikull.
Në pyetjen se çka është për të me rëndësi më të madhe, Hoxhaj, sipas
“Die Welt”, ka dhënë një përgjigje të koduar: “Udhëtimi, udhëtimi,
udhëtimi”. “Shihet se ky Ministër është gjithmonë i angazhuar që vendi i
tij i ri të pozicionohet në hartat politike dhe të mbetet aty përkundër
të gjitha dyshimeve dhe pengesave, me të cilat po përballet.
Gjithashtu, Ministri i Jashtëm i Kosovës angazhohet që edhe qytetarët e
vendit të tij të kenë mundësinë të udhëtojnë, sepse deri më tani për
kosovarët është pothuajse e pamundur që të marrin një vizë për të
udhëtuar në shtetet e BE-së. Liberalizimi i Vizave të cilin Brukseli në
vitin 2009 e bëri të mundur për vendet e Ballkanit Perëndimor, vlen për
të gjithë përveç për Kosovën – shtetin në lindjen e të cilit ndihmoi
edhe vetë Evropa”, thuhet në artikull.
Megjithatë, Ministri Hoxhaj shprehet shumë optimist, duke iu referuar
vizitës së para pak kohëve në Kosovë të Presidentit të KE-së Barroso
dhe të të ngarkuarës me çështjet e politikës së Jashtme Catherine
Ashton. Hoxhaj ka thënë se “ata na konfirmuan që vitin e ardhshëm mund
të fillojmë bisedimet rreth liberalizimit të vizave, nëse raporti i
ardhshëm i BE-së rreth progresit të Kosovës rezulton pozitivisht”.
Po qe se do të ndodhë kështu, sipas “Die Welt”, ky do të ishte një
moment historik për këtë shtet të vogël dhe një perspektivë që do të
ndikonte në mënyrë thelbësore në jetën e përditshme të banorëve të tij.
Në artikull trajtohet edhe fakti se BE-ja, në të cilën Kosova
domosdoshmërisht shpreson shumë, nuk është unike në qëndrimin e saj. Më
pas, bëhet një përmbledhje e ngjarjeve në Kosovë gjatë një dekade, duke
konkluduar se si tutor dhe mbështetës kryesor i saj vazhdon të mbetet
Republika Federale e Gjermanisë, shtet në të cilin, sipas gazetës,
jetojnë 250.000 mijë kosovarë. /Telegrafi/