Hoxhaj në seancën e KS të OKB-së

Ministri i Punëve të Jashtme i Republikës së Kosovës, Enver Hoxhaj, ka udhëtuar për në New York, ku do të marrë pjesë në seancën e radhës të Këshillit të Sigurimit të Kombeve të Bashkuara, e cila do të mbahet të hënën.

Në njoftimin e MPJ-së thuhet se me këtë rast, Hoxhaj para përfaqësuesve të shteteve anëtarë të Këshillit të Sigurimit do të paraqesë zhvillimet pozitive në Kosovë në procesin e rëndësishëm të konsolidimit të shtetësisë dhe në transformimin ekonomik dhe social. Siç bëhet e ditur, një pjesë e fjalimit të ministrit do të përqendrohet edhe në vendosmërinë e Qeverisë së Kosovës për vendosjen e sundimit të ligjit dhe për luftën kundër krimit të organizuar në të gjithë territorin e shtetit.

Në këtë seancë, ministri Hoxhaj do të kërkojë nga Serbia që t’i shpërbëjë strukturat paralele ilegale-shtetërore në Kosovë dhe të heqë dorë nga mbështetja politike për grupe të krimit të organizuar në veri. Po ashtu, ai do të flasë edhe për situatën e fundit të krijuar në veri, pas vendosjes së masave të reciprocitetit nga ana e Republikës së Kosovës ndaj Republikës së Serbisë.

Ministri i Jashtëm kosovar njëherit do t’u shpjegojë përfaqësuesve të shteteve pjesëmarrëse për dialogun teknik në mes Kosovës dhe Serbisë, për mosgatishmërinë e Serbisë që t’i pranojë vulat e Kosovës në takimin e fundit të muajit korrik dhe për domosdoshmërinë kushtetuese për vendosjen e masave të reciprocitetit.

Gjatë qëndrimit në New York, Hoxhaj do të takohet me përfaqësues të shumë shteteve anëtare të Organizatës së Kombeve të Bashkuara, me diplomatë dhe personalitete të jetës publike. /Telegrafi/