Hoxhaj në OKB: Nuk ka aksion unilateral

Ministri i Jashtëm i Kosovës, Enver Hoxhaj, ka thënë se marrja e kontrollit në pikat kufitare në veri nuk paraqet akt unilateral dhe se me këtë pajtohen shumica e shteteve anëtare të Këshillit të Sigurimit të OKB-së.

I pyetur të komentojë deklaratat e shefit të Diplomacisë serbe, Vuk Jeremic, i cili para tij ka thënë se Këshilli i Sigurimit është kundër akteve unilaterale, ndërsa ndihmësi i Sekretarit të OKB-së për operacione paqësore, Edmond Mulet, ka tërhequr vërejtjen se aktet e njëanshme mund të kërcënojnë stabilitetin, Hoxhaj ka thënë “se nuk mund të flas në emër të tjerëve”.

“Por, mendoj puna e Mulet është të raportojë për situatën në terren, e situata në terren tregon se ajo çka do të ndodhë nesër është në përputhje me Rezolutën 1244”, ka thënë Hoxhaj, transmeton B92.

Duke kujtuar takimin e 2 shtatorit në Bruksel dhe arritjen e marrëveshjeve për vulat doganore, ai ka thënë se të premten “Qeveria e Kosovës do ta zbatojë atë marrëveshje në bashkëpunim të ngushtë dhe në koordinim me EULEX-in dhe KFOR-in”.

“Serbia, megjithatë, është e vendosur t’i kundërvihet bashkësisë ndërkombëtare, Këshillit të Sigurimit si institucion, BE-së dhe NATO-s, dhe unë pyetem se a jetojmë në vitin 1991 apo në vitin 2011, vit ky kur të dy shtetet duhet të punojnë për integrimet evropiane”.

Hoxhaj ka thënë se sot nuk do të ndodhë asgjë nëse Serbia dëshiron paqe, siguri dhe stabilitet.

“Nesër në mëngjes, policët e Kosovës dhe doganierët do të jenë në dy vendkalime... sepse ky është kufiri i pranuar i Kosovës, nën autoritetin e qeverisë qendrore dhe kështu do të mbetet”. /Telegrafi/