KMDLNJ: Masa e largimit për Leon e mjaftueshme

Këshilli për Mbrojtjen e të Drejtave e të Lirive të Njeriut
vlerësoi të hënën se masa e largimit të punjonësit të EULEX-it, i njohur
si Leo nuk është e mjaftueshme. Sipas KMDLNJ-së veprimet e këtij
personi, si ofendime në bazë të racës, etnisë, simboleve kombëtare,
religjionit nuk janë shkelje administrative por janë shkelje të
karakterit penal. Sipas KMDLNJ-së, personi i njohur me emrin
Leo që ishte përjashtuar nga EULEX me vendim të shefit të misionit
kishte bërë ankesë kundër këtij vendimi, ndërsa paneli për të Drejtat e
Njeriut i EULEX-it i cili kishte shqyrtuar këtë ankesë i kishte dhënë të
drejtë shefit të misionit dhe ankesën e kishte refuzuar si të pa bazë.
“KMDLNj mendon se masa e zbatuar në këtë rast nuk mjafton dhe me këtë
po dëshmohet paprekshmëria e stafit të misioneve ndërkombëtare në
Kosovë. Nëse i referohemi veprimeve të ka bërë ky person (ish Zyrtar në
EULEX), nuk janë shkelje administrative por janë shkelje të karakterit
penal. Ofendimet në bazë të racës, etnisë, simboleve kombëtare,
religjionit dhe statusit social nuk janë thjesht ofendime apo shkelje
administrative. Kur kësaj i shtohet edhe dhunimi fizik i vartësve duke
shprehur urrejtje etnike dhe religjioze ndaj tyre nuk ka se si quhet
tjetër”, thuhet në komunikatë.
KMDLNj është befasuar që paneli që ka refuzuar ankesën nuk ka
rekomanduar edhe nisjen e hetimeve penale ndaj ish-zyrtarit të EULEX-it.
“...Një hetim i tillë dhe dënim eventual për urrejtje racore dhe
etnike do të ishte një sinjal i qartë për zyrtarë me imunitet të
bunkerizuar diplomatik dhe ligjor. Ky do të ishte po ashtu një mesazh i
qartë edhe për institucionin delegues të këtij misioni, në këtë rast
Bashkimin Evropian që në seleksionimin e personelit, së paku, të përdorë
kriteret e njëjta me procesin e seleksionimit të stafit vendor”,
thekson më tej KMDLNJ. /Telegrafi/