Pastrohen varrezat në veri dhe në jug të Mitrovicës

Pastrohen varrezat në veri dhe në jug të Mitrovicës


Përfaqësuesit e strukturave politike dhe ata të sigurisë, vlerësuan të martën në Komitetin Lokal për Siguri Publike në Mitrovicë, se gjendja e sigurisë në dy javët e fundit ka qenë e qetë dhe pa probleme. Drejtori i Drejtorisë për Mbrojtje dhe Shpëtim, Behxhet Bala, tha se gjatë kësaj periudhe kohore nuk është shënuar ndonjë incident serioz që do të reflektohej në gjendjen e përgjithshme të sigurisë.
Për gjendje të qetë folën edhe përfaqësuesit e policisë dhe KFOR-it, të cilët nuk kanë përmendur ndonjë shqetësim serioz që ka të bëj me situatën e sigurisë.
Në anën tjetër, kryetari i komunës, Avni Kastrati, ka njoftuar për dy projekte që kanë nisur në fundjavë. Ai përmendi pastrimin e varrezave ortodokse në jug si dhe atyre myslimane në veri të qytetit. Ai tha se nuk ka pasur asnjë problem për realizimin e këtij aksioni, ndërkohë që ftoi qytetarët serbë që të bëhen pjesë e projekteve të përbashkëta në të mirë të të gjithëve.
Në këtë kontekst, kryetari përmendi edhe nisjen e punimeve në arat që ndodhen në veri të qytetit, ku që 11 vjet nuk janë punuar për arsye të ndryshme, qoftë të natyrës ekonomike, qoftë të sigurisë.
“Kjo është rrjedhojë e një memorandumi që kemi nënshkruar me Ministrinë e Bujqësisë për mbështetjen e fermerëve të veriut me nga 280 euro për hektarë. Përveç fermerëve shqiptarë ka edhe serbë të interesuar që të përfitojnë nga ky projekt”, tha Kastrati.