Ndarja nuk përfundon vetëm me Kosovën

Shumë ministra të Bashkimit Evropian kanë hedhur poshtë në deklarimet e tyre në Luksemburg idetë për ndarje të Kosovës.

I ashpër kundër kësaj ideje, duke folur para disa gazetarëve, ka qenë sidomos ministri i Jashtëm i Republikës Çeke, Karel Schwarzenberg, i cili i ka quajtur këto ide si “ide që kthejnë në konfliktet e fillimit të shekullit XX e jo nga përparimi në shekullin XXI”, transmeton Zëri.

“Kjo është ide e papranueshme. Nëse pranohet ideja për ndarjen e Kosovës, do të flitet për ndarjen e Bosnjë-Hercegovinës. Pse jo, do të flitej atëherë edhe për ndarjen e veriut të Serbisë, ku në Vojvodinë jeton një bashkësi e madhe e pakicës hungareze. Këto nuk janë ide të pranueshme“, ka thënë ministri i Jashtëm çek, Schwarzenberg. /Telegrafi/