KIPRED: Ligji për ndërmarrjet publike ka mangësi

Ligji për ndërmarrjet publike nuk e definon qartë natyrën
politike të drejtorëve të këtyre bordeve, duke i lënë kësisoj hapësirë
cilësdo qeveri që nëpër bordet e ndërmarrjeve publike të vendosë persona
politik.Kështu u tha në publikimin e një studimi nga
Instituti Kosovar për Kërkime dhe Zhvillime të Politikave rreth
përzgjedhjes politizimit dhe profesionalizmit të bordeve të drejtorëve
të ndërmarrjeve publike dhe agjencive të pavarura në Kosovë.
Krenar Gashi, drejtor ekzekutiv i KIPRED-it, ka thënë se studimi vjen
pas shumë kritikave rreth politizimit dhe performancës së dobët të
bordeve të drejtorëve të këtyre ndërmarrjeve dhe agjencive.
Shkamb Qavdarbasha, bashkautor i studimit, ka prezantuar gjetjet
kryesore dhe rekomandimet e studimit. “Ne kemi gjetur se ligji për
ndërmarrjet publike nuk e definon qartë natyrën politike të drejtorëve
të këtyre bordeve, duke i lënë kësisoj hapësirë cilesdo qeveri që nëpër
bordet e ndërmarrjeve publike të vendosë persona politik.”
“Tek agjencitë e pavarura, kemi vërejtur një diksrepancë sa i përket
mënyrës së përzgjedhjes dhe kritereve për përzgjedhje të bordeve të
tyre. Kjo për shkak së agjencitë janë formuar dhe funksionojnë në baze
të ligjeve të veçanta, shumica prej të cilave nuk janë draftuar në bazë
të politikave publike por më shumë si pasojë e presionit të bashkësisë
ndërkombëtare,” ka sqaruar Qavdarbasha.
Një e gjetur tjetër qenësore e këtij studimi është përgjegjësia dhe
llogaridhënia e agjencive të pavarura ndaj Kuvendit të Kosovës. Pyetja e
shtruar është se çfarë ndodhë kur Kuvendi i Kosovës nuk i aprovon
raportet e agjencive të pavarura, ndërsa është vërejtur mungesa e një
mekanizmi llogaridhënës dhe të mbajtjes së përgjegjësisë. /Telegrafi/