LDK akuzon Krasniqin se po bën eliminime politike

Grupi i ekspertëve i kulturës, rinisë dhe sportit i Lidhjes
Demokratike të Kosovës ka akuzuar ministrin e MKRS-së, Memli Krasniqi se
po vazhdon me eliminimin politik të udhëheqësve të departamenteve dhe
të institucioneve.“Ministri i Kulturës, Rinisë dhe Sportit, i
njohur për dy veprime të karrierës, heqja e fotove të presidentit
historik të Kosovës, dr. Ibrahim Rugova, dhe Nënë Terezës, si dhe
themelimin e një çmimi që më parë ishte themeluar, me urdhrin dhe me
ndihmën e shefit të tij, po vazhdon eliminonim politik të udhëheqësve të
departamenteve dhe të institucioneve të kulturës”, thuhet në reagimin e
ekspertëve të LDK-së.
“Pasi largoi politikisht drejtorin e Departamentit të Rinisë dhe atë
të Zyrës së Informimit, pasi solli politikisht sekretarin e përgjithshëm
dhe nëpërmjet njerëzve të tij shantazhoi drejtorin e Qendrës
Kinematografike dhe atë të Galerisë së Arteve, tani Krasniqi ka shpallur
konkurs politik për këta dhe drejtorë të tjerë, që të gjithë me
kontrata valide”.
Po ashtu, potencohet në reagim, të njëjtin veprim ministri Krasniqi
ka bërë lidhur me drejtorin artistik të Teatrit Kombëtar të Kosovës, “që
ka kontratë të ligjshme, gjë e pranuar publikisht edhe nga vetë
Ministria”.
Ministri – siç thekson LDK-ja, “me dëshirë ose i urdhëruar, dhjetë
ditë më parë, në kundërshtim me ligjin, ka urdhëruar që të emërohet
drejtori i Departamentit të Rinisë, ish-ushtruesi i detyrës së
sekretarit të përgjithshëm, ndërsa sot ka shpallur konkursin po për të
njëjtin pozicion”.
Sipas Ligjit për Institucionet e Kulturës, sipas LDK-së, këto
kontrata janë valide dhe janë nënshkruar pas vlerësimit të punës së
drejtorëve. Qeveria e Kosovës, edhe në këtë dikaster – sipas ekspertëve
të kësaj partie – që nga fillimi i mandatit, nuk ka bërë asnjë punë për
t’u shënuar, veç shantazhimit të shërbyesve civilë.
Lidhja Demokratike e Kosovës këto veprime i konsideron joligjore, të
papërgjegjshme dhe të papranueshme. “Me këto veprime provohet se Qeveria
ka emëruar në krye të dikasterëve shërbëtorë politikë, pa dije dhe pa
kulturë, të cilët po shumëfishojnë veten duke sjellë aty edhe njerëz të
tjerë si vetja”, theksohet më tej.
Lidhja Demokratike e Kosovës, nëpërmjet reagimit, ndwr tw tjera
kërkon që të respektohen ligjet dhe normat e tjera, të mos ketë
ndërhyrje të strukturave politike në administratën e Ministrisë dhe të
institucioneve, por të punohet për të krijuar kushte për punë. /Telegrafi/