Edhe Kosova përfshihet në deklaratën e SEECP

Kosova është përfshirë në deklaratën e presidentëve në fund të
samitit të Procesit të Bashkëpunimit të Vendeve të Evropës Juglindore
(SEECP) në Budva të Malit të Zi, kjo është bërë e mundur nga insistimi i
Shqipërisë. Në samitin e 14 në Budva presidenti i Shqipërisë, Bamir
Topi deklaroi se kjo është një iniciativë që synon forcimin e lidhjeve e
mbështetjes mes vendeve. “Kosova nuk mund e nuk duhet më të lihet
jashtë”.Mali i Zi e mbylli të premten Presidencën dhe
drejtimi i saj do t’i kalojë Serbisë, raporton Shekulli. Samiti i
kryetarëve të shteteve dhe i qeverive të SEECP-it është një iniciativë e
vendeve të Evropës qendrore e rajonit dhe drejtohet çdo vit nga një
shtet anëtar.
Në këtë Samit të rëndësishëm ishin të pranishëm bashkë me presidentin
Topi dhe presidenti i Malit të Zi, Filip Vujanovic, presidenti i
Serbisë, Boris Tadic, presidenti i Bosnje-Hercegovinës, Nebojsha
Radmanovic, presidenti i Kroacisë, Ivo Josipovic dhe presidenti i
Maqedonisë, Gjorgje Ivanov.
Një ditë më parë, presidenti Topi theksoi gjithashtu se Kosova është
një shtet i ri, një realitet i ri, i cili duhet pranuar e mbështetur nga
të gjitha nismat dhe forumet ndërshtetërore rajonale dhe më gjerë. “Çdo
qëndrim tjetër refuzues, sidomos në nismat e përbashkëta rajonale,
cenon parimet tona të bashkëpunimit dhe u imponon vendeve anëtare të
rishohin përparësitë e tyre në angazhimet rajonale”. /Telegrafi/