Peticioni për të zhdukurit, 500.000 nënshkrime

Gjysmë milioni qytetarë të Ballkanit dy muajt e fundit e kanë
nënshkruar peticionin për të formuar një komision rajonal, që ka për
detyrë zbardhjen e fatit të mijëra viktimave nga luftërat e viteve
’90-ta në ish-Jugosllavi.Kësaj iniciative i janë bashkuar
1500 organizata joqeveritare, ndërsa qëllimi është i thjeshtë, por
ambicioz: të hartohet një listë e detajizuar e viktimave të luftës në
Kosovë, Kroaci dhe Bosnje, si dhe rrethanat e vdekjes së tyre.
“Emri i çdo personi që është vrarë si pasojë e krimeve të luftës apo
duke luftuar, do të regjistrohet, sikurse edhe rrethanat në të cilat ata
janë vrarë”, ka thënë për agjencinë e lajmeve AFP, Natasa Kandic,
drejtoreshë e Fondit Humanitar për të Drejtat e Njeriut.
Ajo po ashtu ka thënë se ngjashëm do të veprohet edhe me ata që
konsiderohen të zhdukur, numri i të cilëve shkon në 15 mijë në tërë
rajonin. “Vizioni ynë është që njëherë e përgjithmonë t’i japim fund
kësaj praktike në Ballkan të manipulimit të shifrave pa i cituar emrat e
viktimave”, ka thënë Kandic.
Organizatorët duan që autoritetet e ish republikave jugosllave të
ngrenë një komision të pavarur- KOMRA, për të mësuar se çka u ka ndodhur
viktimave. Kandic shpreson se komisioni do të themelohet në fillim të
vitit 2013.
Në Kosovë ende janë të zhdukur afër 2000 persona që nga koha e
luftës. Ndërkaq rreth 3000 të tjerë, që llogariteshin si të zhdukur,
janë gjetur gjatë viteve të pasluftës nëpër varrezat masive në Serbi.
Forcat ushtarako-policore serbe, pasi i kishin vrarë shqiptarët civil në
Kosovë, në mesin e tyre edhe shumë fëmijë, i kishin transportuar dhe
varrosur në Serbi, me qëllim të humbjes së gjurmëve të krimit. /Telegrafi/