Sot, dita e pajtimeve pa nënshkrime me Serbinë

Delegacioni i Kosovës i udhëhequr nga Edita Tahiri dhe ai i
Serbisë i udhëhequr nga Borko Stefanovic, kanë filluar mëngjesin e sotëm
edhe një raund tjetër bisedimesh, në tëntim për të arritur marrëveshjet
e para konkrete. Zyrtarë të Bashkimit Evropian besojnë se
së shpejti pritet të arrihen marrëveshjet e para, ndërsa për këtë duhet
që të arrihet pajtimi për gjashtë fusha të ndryshme i cili pritet të
ndodhë sot.
Ende nuk dihet se cilat janë modalitetet e një marrëveshjeje të
mundshme, mirëpo besohet se tashmë është arritur pajtimi për lirinë e
lëvizjes, raporton Koha.
Dokumenti final me të gjitha pajtimet dhe marrëveshjet do t’i
dorëzohet Robert Cooperit, të dërguarit të BE-së për këto bisedime,
ndërsa në këtë dokument nuk do të duhet që palët të vënë nënshkrimet e
tyre, për shkak se Serbia nuk do ta bënte këtë për shkak se përmendet
Kosova si shtet dhe Kosova nuk do ta bënte sepse në rastin e kundërt do
të duhej të nënshkruante dokumentin ku përmendet Rezoluta 1244. /Telegrafi/