Fillon fushata “Një milion nënshkrime për KOMRA”

Të martën në mesditë në Prishtinë, në sheshin “Nëna Terezë”, si dhe në Sarajevë, Lubjanë, Zagreb, Banja Llukë, Beograd, Shkup dhe Podgoricë, fillon fushata më e madhe rajonale ndonjëherë e realizuar, gjatë së cilës do të mblidhen një milion nënshkrime të përkrahjes për themelimin e Komisionit Rajonal për vërtetimin e fakteve për krimet e luftërave dhe shkeljeve të tjera të rënda të drejtave të njeriut, të kryera në hapësirën e ish-RSFJ-së gjatë periudhës kohore 1991-2001 (KOMRA).
Në aksionin e titulluar “Një milion nënshkrime për KOMRA” në tetë qytete të rajonit do të marrin pjesë 500 vullnetarë dhe vullnetare deri sa mijëra të rinj do të bartin fushatën e mbledhjes së nënshkrimeve të cilën do ta koordinojë nisma e të rinjve për të drejtat e njeriut e cila në të gjitha shtetet trashëgimtare të RSFJ-së do të zgjasë deri më 6 qershor.

Nënshkrimet në Kosovë do të mblidhen në rrugët e qyteteve nëpër tenda, por edhe në kuadër të fushatës “derë më derë”.

Dhjetë vite nga përfundimi i konflikteve të armatosura në hapësirën e ish-SFRJ-së në asnjërën nga këto shtete nuk është bërë regjistrimi i të vrarëve në luftë ndërsa më shumë se 15 mijë persona ende konsiderohen si të zhdukur. Viktimat janë të margjinalizuara, zëri i tyre rrallë dëgjohet në publik, ndërsa me numrin e të vrarëve shpesh manipulohet për qëllime politike.

Këto dhe shumë arsye tjera kanë shtyrë më shumë se 1.500 shoqata dhe individë të të gjitha nacionaliteteve dhe religjioneve nga hapësira e ish-RSFJ-së, të mbledhura në Koalicionin për KOMRA të avokojnë krijimin e një komisioni të pavarur ndërshtetëror si trupë jashtëgjyqësore e cila duhet të vërtetojë dhe t’i prezantojë publikisht faktet mbi ngjarjet e luftërave të kaluara. Në mesin e tyre ka shoqata të viktimave, të zhdukurve, veteranë, llogorash, gazetarë, bashkësive të pakicave, organizatave për të drejtat e njeriut.

Komisioni përmes dëgjimeve publike të dëshmive të viktimave do të ndihmojë që në regjion të dëgjohet zëri i tyre, dhe se në këtë mënyrë publiku të nxitet në bashkëndjesi, respekt dhe solidaritet me viktimat nga të gjitha grupet etnike. Në raportin e saj përfundimtar do të duhej të përgatitet regjistri i të vrarëve, dhe të zhdukurve, varrezave masive, llogoreve dhe vendeve tjera të ndalesës. /Telegrafi/