Kosova, shembull për përfaqësimin e femrave në Kuvend

Presidentja e Kosovës, Atifete Jahjaga, ëhstë kthyer të shtunën
nga vizita në Lituani, ku mori pjesë në konferencën “Gratë përforcojnë
demokracinë: praktikat më të mira”, e -organizuar nga presidentja e
Lituanisë, Dalia Grybauskaite dhe presidentja e Finlandës, Tarja
Halonen, në kuadër të Forumit për Demokraci, në të cilin përfaqësohen
një numër i madh shtetesh.Jahjaga ishte paneliste në
sesionin “Luftimi i dhunës kundër grave dhe trafikimit me qenie
njerëzore”, ndërsa paraqitja e saj u prit me shumë interesim nga
pjesëmarrësit e konferencës.
Në konkluzionet e konferencës, Kosova u përmend si shembull i mirë
për përfaqësimin e femrave në Kuvendin e Kosovës, si dhe për
legjislacionin për luftimin e dhunës kundër femrës dhe kundër trafikimit
me qeniet njerëzore.
Gjatë qëndrimit në Vilnius, presidentja Jahjaga zhvilloi një varg
takimesh zyrtare me udhëheqëse shtetesh dhe personalitete të tjera të
larta. Ajo u takua me sekretaren amerikane të Shtetit, Hillary Clinton,
presidenten e Finlandës, Tarja Halonen, presidenten e Lituanisë, Dalia
Grybauskaite, përfaqësuesen e Lartë e BE-së për Politikë të Jashtme dhe
Siguri, Catherine Ashton, kryetaren e Kuvendit të Letonisë, Salvita
Aboltina, presidentin e Mongolisë, Elbegdorj Tsakhia, zonjën Melanne
Verveer, ambasadore në Departamentin Amerikan të Shtetit për çështjet
globale të gruas, drejtorin e Instituti Nacional Demokratik, Kenneth
Wollack, e shumë përfaqësuese shtetesh që morën pjesë në konferencën e
Vilniusit. /Telegrafi/