Gjermania do që Kosova të jetë shembull i suksesit

Ministrja e Integrimit Evropian, Vlora Çitaku, priti në një
takim anëtarin e Bundestagut Gjerman, Peter Weiss, dhe ambasadorin
gjerman Ernst Reichel.
Ministrja Çitaku rikonfirmoi në takim
përkushtimin e Qeverisë së Kosovës për arritjen e standardeve evropiane
për liberalizim të vizave dhe proceset tjera të integrimit evropian.

Ministrja Çitaku po ashtu ka potencuar ndryshimet në qasjen e
Qeverisë se Kosovës ndaj agjendës evropiane e cila vërehet me
përkushtimin e të gjitha institucioneve qeveritare në aprovimin e
legjislacionit dhe Politikave në kuadër të ministrive përkatëse.

“Procesi i liberalizimit të vizave për qytetarët e Kosovës duhet të
hapet sa më shpejt duke marrë në konsideratë se të gjitha kushtet për
fillimin e këtij procesi tashmë janë realizuar nga Qeveria e Republikës
së Kosovës”, thuhet në komunikatën për shtyp të lëshuar nga zyra e
ministres Çitaku.

Anëtari i Bundestagut Gjerman, Peter Weiss, ka falënderuar Ministren
Çitaku për pritjen si dhe ka ofruar mbështetjen e tij dhe të Qeverisë
Gjermane për proceset nëpër të cilat po kalon Kosova, duke vlerësuar
lartë përkushtimin e saj dhe të vendit tonë që Kosova suksesshëm të ecën
përpara drejt integrimit Evropian.

“Gjermania dëshiron që Kosova të jetë një shembull i suksesit si
shtet funksional dhe demokratik”, thuhet në komunikatë. /Telegrafi/