Gjermania lobon për njohjen e Kosovës

Në ditën e dytë të vizitës zyrtare në Republikën Federale të
Gjermanisë, ministri i Punëve të Jashtme i Republikës së Kosovës, Enver
Hoxhaj është takuar me ministrin Federal të Punëve të Jashtme të
Gjermanisë, Guido Westerwelle. Ky i fundit ka thënë se diplomacia
gjermane do të angazhohet fuqishëm në përkrahjen e diplomacisë kosovare
në përpjekjet për të shtuar numrin e njohjeve të shtetit të Kosovës dhe
anëtarësimin në organizatat e ndryshme ndërkombëtare.Ministri
i Jashtëm gjerman ka përshëndetur njohjen që ka ardhur dy ditë më parë
nga Principata e Andorrës, ndërsa ftoi shtetet tjera që ende nuk e kanë
njohur Kosovën ta marrin një hap të tillë.
Westerwelle, po ashtu, ka thënë se Gjermania do të ndikojë te pesë
shtetet e BE-së që ende nuk e kanë njohur Kosovën, që sa më parë të
marrin një vendim të tillë dhe se Gjermania do të ndihmojë Kosovën edhe
sa i përket nënshkrimit të marrëveshjeve dhe vendosjen e marrëdhënieve
kontraktuale me Bashkimin Evropian.
Ministri Federal i Punëve të Jashtme ka shprehur përkrahjen e
palëkundur të Gjermanisë sa i përket sovranitetit dhe integritetit
territorial të Kosovës, ndërsa ka ofruar edhe përkrahje edhe për
zhvillimin ekonomik.
Në anën tjetër, Ministri i Punëve të Jashtme i Kosovës, Enver Hoxhaj,
ka falënderuar Ministrin Westerwelle për qëndrimet e qarta mbështetëse
rreth të gjitha proceseve në Kosovë, veçanërisht rreth perspektivës
evropiane të shtetit të Kosovës.
Hoxhaj ka thënë se adresa e parë politike në Evropë për Kosovën dhe qytetarët e saj është Berlini.
Rreth proceseve integruese të Kosovës, Hoxhaj ka thënë shteti dhe
qytetarët e Kosovës kanë nevojë për një perspektivë të qartë evropiane.
Gjatë takimit, Ministri Hoxhaj dhe Ministri Westerwelle, kanë
nënshkruar një marrëveshje për thellimin e bashkëpunimit mes dy
diplomacive. Të premten, Ministri Hoxhaj ka takuar edhe këshilltarin e
kancelares gjermane, Angela Merkel, dr. Christoph Heusgen. /Telegrafi/