Hungaria do të lobojë për njohjen e Kosovës

Presidentja e Republikës së Kosovës, Atifete Jahjaga, gjatë ditës së tretë të vizitës shtetërore në Hungari, u prit nga kryeministri i Hungarisë, Viktor Orban. Kryeministri hungarez vlerësoi marrëdhëniet e mira ndërmjet Kosovës dhe Hungarisë dhe tha se vendi i tij i ka dhënë përkrahje dhe do të vazhdojë ta mbështesë Kosovën në proceset e saj integruese.

Kryeministri Orban tha se të dyja vendet duhet të rrisin nivelin e bashkëpunimit në veçanti në fushën e ekonomisë, ndërsa vlerësoi se është i nevojshëm promovimi i biznesit hungarez në Kosovë.

Po ashtu ai tha se Hungaria do të ndihmojë Kosovën në rrugën e saj evropiane dhe do të angazhohet në inkurajimin e vendeve anëtare të BE-së, që ende nuk e kanë njohur Kosovën, që ta bëjnë këtë.

Ndërkaq, presidentja e Republikës së Kosovës, Atifete Jahjaga tha se marrëdhëniet ndërmjet të dyja vendeve po zhvillohen gjithanshëm si në fushën politike ashtu edhe në ato shtetërore, por vlerësoi se edhe marrëdhëniet në fushën e ekonomisë janë shumë të rëndësishme.

Ajo tha se Hungaria mund të luaj një rol të madh në përgatitjen e Kosovës në procesin e integrimeve euroatlantike, sepse përvoja e saj është e rëndësishme për Kosovën në plotësimin e kushteve dhe të standardeve për anëtarësim.

Jahjaga tha se Hungaria mund të ndihmojë në lobime të reja për Kosovën, ndërsa shprehu qëndrimin se Kosovës i duhet marrëdhënia kontraktuale me BE-në dhe ndihma e Hungarisë në lobimin tek 5 vendet që ende nuk kanë njohur, në veçanti tek vendet në fqinjësi të saj.

Presidentja e Republikës tha se dialogu i ndërmjetësuar nga BE-ja me Republikën e Serbisë, po zhvillohet për faktin se nuk ka asnjë alternativë tjetër se si të detyrohet Serbia që të përmbushë obligimet e saj, edhe ndërkombëtare, karshi Kosovës.

Ajo tha se e përkrah dialogun sepse është në të mirë të të gjithë qytetarëve, por edhe sepse është e vetmja rrugë që të arrihen marrëveshje që bazohen në praktikat dhe standardet evropiane.

Presidentja Jahjaga dhe kryeministri hungarez, Orban, diskutuan edhe për një numër çështjesh të tjera që janë me interes për të dyja vendet. /Telegrafi/