Gjermania lobon për Kosovën

Kryetari i Kuvendit të Republikës së Kosovës, Jakup Krasniqi u
takua me një delegacion të Republikës Federale të Gjermanisë, i kryesuar
nga Dirk Niebel, ministër për Bashkëpunim dhe Zhvillim Ekonomik. Niebel
ka pohuar se Gjermania po bën përpjekje që Kosovën ta njohin të gjitha
vendet e BE-së. Në këtë takim, Krasniqi ka kërkuar nga
qeveria e vendit mik dhe ministri Niebel, të angazhohen për njohjen e
Kosovës edhe nga pesë vendet e mbetura të BE-së, ndërsa ka vlerësuar të
shkëlqyeshme marrëdhëniet ndërmjet dy vendeve dhe e ka falënderuar
shtetin gjerman për mbështetjen e vazhdueshme dhënë Kosovës.
Kryeparlamentari po ashtu kërkoi mbështetje në procesin e
liberalizimit të vizave dhe për anëtarësimin e Kosovës në strukturat
euro-atlantike.
Ministri gjerman për Bashkëpunim dhe Zhvillim Ekonomik, Dirk Niebel,
duke e falënderuar kreun e Kuvendit të Kosovës për pritjen, është
shprehur i kënaqur me numrin e ligjeve të miratuara nga legjislativi i
vendit.

Ai ka vlerësuar rëndësinë që kanë për vendin miratimi i ligjeve
cilësore, si dhe kontrolli i zbatimit të tyre. Niebel ka pohuar se
Gjermania po bën përpjekje që Kosovën ta njohin të gjitha vendet e
BE-së.
Zgjidhja e kësaj çështjeje, ka thënë ministri gjerman, do ta
lehtësojë procesin e liberalizimit të vizave ndërmjet Kosovës dhe
vendeve të BE-së, si dhe do ta ndihmojë procesin e integrimit të Kosovës
në strukturat euro-atlantike.
Të dy bashkëbiseduesit janë pajtuar se ka vend për thellimin e
mëtutjeshëm të marrëdhënieve të mira ndërmjet dy vendeve. /Telegrafi/