KPJ: Qeveria t’i raportojë Kuvendit për dialogun

Klubi për Politikë të Jashtme (KPJ) po përcjellë me vëmendje zhvillimet e fundit në “dialogun” mes Qeverisë së Kosovës dhe asaj të Serbisë, të facilituar nga zyra e Baroneshës Catherine Ashton.

Në një komunikatë për medie thuhet se KPJ vlerëson rëndësinë e procesit të normalizimit të marrëdhënieve mes Kosovës dhe Serbisë, si proces që duhet të synoj arritjen e paqes dhe hapjen e perspektives evropiane për të dyja vendet.

“Nga ky këndvështrim, KPJ i sheh paralajmërimet për arritjen e marrëveshjeve në tri çështjet e hapura: liria e lëvizjes, regjistrat civile dhe diplomat universitare, si zhvillim tejet serioz, që meriton vëmendjen e institucioneve dhe publikut në Kosovë”, thuhet në komunikatë.

Andaj duke patur parasysh rëndësinë e marrëveshjeve të proklamuara, në përputhje me dispozitat e Kushtetutës së Kosovës, frymën e rezolutës për dialogun të aprovuar kohë më parë në Kuvendin e Kosovës dhe natyrën sensitive të raporteve Kosove-Serbi mbi të cilat prekin marrëveshjet, KPJ konsideron si të domosdoshme thirrjen urgjente të seancës plenare të Kuvendit të Kosovës, ku Qeveria do të raportonte mbi rrjedhën e dialogut, përmbajtjen e rezultateve e këtyre bisedimeve (ku do deputetët do te njoftoheshin hollësisht mbi atë se çka është dakorduar) dhe ku do të riafirmohej vullneti i përfaqësuesve të popullit për vazhdimin e procesit. /Telegrafi/