Fitou për bisedimet, fillim i njohjes reciproke

Ambasadori i Francës në Kosovë, Jean François Fitou, lidhur me marrëveshjet e arritura ndërmjet delegacionit të Kosovës dhe atij të Serbisë, ka deklaruar vet çështja e bisedimeve ndërmjet dy palëve është fillimi i njohjes reciproke. Fitou ka thënë se ky është një hap i mirë në rrugën drejtë integrimeve dhe në lehtësimin e jetës së qytetarëve.

“Nuk do të hyjë në detaje, ka njerëz të cilët janë më kompetent se unë për të folur për këtë marrëveshje të cilën unë nuk e kam parë. Janë tri ose katër mundësi të mira nga ajo që e dimë nga kjo marrëveshje. E para është vullneti i mirë dhe ecja e mirë e dy palëve” , ka thënë ambasadori francez, njofton Koha.

“Gjëja e dytë e cila është shumë e rëndësishme dhe të cilën e kemi përsëritur edhe më herët është se të gjitha pikat e kësaj marrëveshje flasin për lehtësimin e jetës së qytetarëve pa marrë parasysh përkatësinë etnike ose vendin ku jetojnë. Kjo marrëveshje është rezultat i vullnetit të mirë të dy palëve dhe angazhim për përmirësimin e jetës së qytetarëve, këtë ia ka thënë edhe zonja Ashton kryeministrit Thaçi dje në Bruksel”.

“Dhe e fundit, pa marrë parasysh kohëzgjatjen e rrugëtimit tonë, ky rrugëtim do të jetë një hap i rëndësishëm në rrugën e integrimeve. Shpresoj dhe mendoj se vet çështja e bisedimeve ndërmjet palëve është fakt i fillimit të njohjes reciproke”, ka thënë ambasadori Fitou. /Telegrafi/