LDK: Gjendje e rëndë në sistemin e drejtësisë

Ekipi i ekspertëve për ‘shtetin e së drejtës’ pranë Lidhjes Demokratike të Kosovës vlerësoi se gjendja aktuale e drejtësisë është e rëndë, ndërsa sipas tyre, probleme ka në aspektin e ligjbërjes dhe në zbatimin e ligjeve.

Ligji për mbrojtjen e dëshmitarëve, ligji për ndihmë juridike falas dhe ligji për bashkëpunim juridik në çështjet penale, sipas LDK-së, janë disa nga ligjet, të cilat kalojnë në Parlament, por si rezultat i mungesës së buxhetit, ato nuk pritet të hyjnë në fuqi deri në katër vitet e ardhshme. Përfaqësuesi i LDK-së, Arben Gashi, tha se kjo parti konstaton se sfidë tjetër mbetet edhe gjendja në sistemin prokurorial.

“Duhet të merren masa të cilat garantojnë që në Kosovë të kemi, Hartimin, buxhetimin dhe zbatimin e ligjeve, të cilat rrjedhin nga rrethanat sociale dhe ekonomike në vend, të jenë në përputhje me standardet ndërkombëtare si dhe të kenë të garantuar buxhetin për zbatim. Të garantohet ndarja e pushteteve dhe të ndalohet ndërhyrja e Qeverisë në punët e gjyqësorit dhe të prokurorisë, në mënyrë që të krijohet baza e qëndrueshme e punës profesionale”, tha Gashi, ndërsa citon RTK.

Lidhur me sundimin e ligjit në veri të Kosovës, LDK-ja rekomandoi që të fillojnë konsultimet urgjente me të gjithë mekanizmat me qëllim të fillimit sa më të shpejtë të punës së gjykatës dhe prokurorisë së Mitrovicës. Në emër të LDK-së, Gashi, po ashtu, vlerësoi se vendimi i Qeverisë për formimin e këshillit konsultativ për drejtësi është në kundërshtim me sistemin juridik në vend, andaj, ai ka kërkuar anulimin e këtij vendimi. /Telegrafi/