Nënshkruhen kontratat për Kompleksin e Pallatit të Drejtësisë

Zyrtarë të Qeverisë së Kosovës dhe të Zyrës Ndërlidhëse të
Komisionit Evropian nënshkruan dy kontrata pune lidhur me kompleksin e
Pallatit të Drejtësisë, që do të ndërtohet në lagjen Prishtina e Re, në
Hajvali. Pallati i Drejtësisë u tha se do të ofrojë hapësira
adekuate për sistemin gjyqësor dhe do të ndihmojë në përmirësimin e
shërbimeve. Gjithashtu do të lehtësojë qasjen publike dhe rrisë
mirëbesimin në sektorin e drejtësisë, duke përmirësuar efiçencën,
pavarësinë, besimin dhe transparencën e sistemit gjyqësor. .
Zëvendëskryeministri, Hajredin Kuçi, njëherësh ministër i Drejtësisë tha se ligji dhe rendi janë prioritet.
“Në këtë drejtim, Pallati i Drejtësisë është një parakusht për
funksionimin më të mirë të sistemit ligjor në Kosovë dhe përfaqëson
identitetin dhe krenarinë e këtij sistemi, për këtë ne i jemi mirënjohës
Komisionit Evropian dhe presim të realizohen gjykime të drejta dhe do
të ndërtohet një sistem i standardeve evropiane, përmes së cilit
kredibiliteti i ligjit dhe drejtësisë do të rritet”, tha ai.
Kjartan Björnsson, shef i Operacioneve në Zyrës Ndërlidhëse të
Komisionit Evropian tha se Komisioni Evropian ka premtuar mbi 25 milionë
euro për realizimin e këtij projekti.

“Infrastruktura e re do të lejojë që institucionet kryesore të
drejtësisë, duke përfshirë edhe ato që janë të shpërndara në të gjithë
Prishtinën, të vendosen nën të njëjtën çati. Kjo do të përmirësojë
sundimin e ligjit në aspektin cilësor dhe sasior, dhe në këtë mënyrë do
të rrisë efikasitetin e sistemit të drejtësisë. Komisioni Evropian ka
kënaqësinë të ndihmojë në përpjekjet e Kosovës në rrugën e saj drejt
integrimit evropian”, tha ai.
Mahir Yagcilar, ministër i Administratës Publike, tha se ministria që
ai drejton në pajtim me përgjegjësitë, do të jetë një partner serioz
përgjatë rrugëtimit të përbashkët për krijimin e premisave moderne dhe
funksionale për të gjitha institucionet në Kosovë, posaçërisht në
sektorin e drejtësisë. /Telegrafi/