Ristic i ftoi serbët në luftë të re

Slavisha Ristic (1960), ekonomist me profesion, përfaqësues i Partisë Demoktratike të Serbisë, i ashtuquajtur kryetar i Komunës së Zubin Potokut, si dhe përfaqësues i Këshillit Nacional Serb, në pranverën e vitit 2001 u emërua kryetar i Nënkomitetit për kthimin e refugjatëve serbë në Kosovë. Atë vit i ftoi serbët e Kosovës në një luftë të re.
Dokumenti i NATO-s - të cilin në vazhdime po e publikon portali “LajmeShqip” - e pasqyron Risticin si një militant të “kauzës serbe”, por me “tone më të moderuara”. Ristic, pas luftës në Kosovë, kishte kërkuar me ngulm nga bashkësia ndërkombëtare “kthimin e të zhvendosurve serbë në Kosovë, ashtu siç i kanë kthyer edhe shqiptarët”.

Karakter i qetë dhe me vetëkontroll, Ristic përshkruhet në dokument si person që gjatë bisedave vazhdimisht i ikë temës qendrore.

Ai ka një papajtueshmëri të plotë me bashkësinë ndërkombëtare në Kosovë dhe i akuzon ata se nuk e kanë zgjidhur drejtë çështjen e Miloshevicit. Megjithatë, politikisht - thuhet në dokument - ai është në kundërshtim të vazhdueshëm me përfaqësuesin e SPS-it në Zubin Potok, Zoran Vulovic.

Çështjet e veriut të Kosovës Ristic i ka diskutuar me Beogradin, ashtu si dhe me të gjithë drejtuesit tjerë politikë të serbëve të veriut. Në janar të vitit 2001 ka biseduar në Beograd me Presidentin Kostunica (partisë së të cilit i takon) për temën e Kombinatit “Trepça” dhe kthimin e serbëve në veri të Kosovës. Bashkë me Slavisha Risticin, në takim kanë qenë edhe Marko Jakshiq dhe Vuko Antonijevix.

Ndërkohë, në zhvillimet e shkurtit të vitit 2001, dokumenti i NATO-s e përshkruan Risticin si një person të rrezikshëm, por të mbuluar që kishte refuzuar një marrëveshje me KFOR-in.

Në qershor të vitit 2001, Ristic ka organizuar një tubim të madh të serbëve në veri, kundër aplikimit të taksave të UNMIK-ut për serbët. Në tubimin nxitës të trazirave ishin edhe Nedeljkovic, Miljentijevic, Obradovic, Bosovic dhe i ashtuquajturi kryetar i Komitetit të Krizës, Nebojsa Minic.

Ai i ka ftuar serbët që në asnjë formë të mos i paguajnë taksa UNMIK-ut dhe është deklaruar haptas edhe kundër PSSP-së, shefit të atëhershëm të UNMIK-it.Nëse kjo rezistencë është e pamjaftueshme me protesta, atëherë këtë do ta bëjmë edhe me një luftë të re në Kosovë, kishte deklaruar Ristic. /Telegrafi/