MASHT-i ofron përkrahje për studentët nga Presheva

Zëvendësministri i Arsimit, Shkencës dhe Teknologjisë (MASHT), Nehat Mustafa ka pritur në takim kryetarin e Komunës së Preshevës, Ragmi Mustafa, me ç’rast janë diskutuar mundësitë për rritjen e numrit të studentëve nga Lugina e Preshevës në universitetet publike të Kosovës.
Mustafa ka dhënë zotimet se Ministria e Arsimit do të bëjë të gjitha përpjekjet për sistemimin e të maturantëve të Preshevës në Universitetin Prishtinës dhe Universitetin e Prizrenit.

“Ministria e Arsimit është e gatshme të ndihmojë në të gjitha format e mundshme arsimin e lartë dhe atë paraunivesitarë në Preshevë, duke ofruar trajnime në zhvillimin profesional të mësimdhënësve, shpërndarjen e teksteve shkollore për klasat e para, etj”, tha ai.

Ndërkaq, kryetari i Preshevës, Ragmi Mustafa nga ana e tij ka vlerësuar lartë kontributin e MASHT-it në përkrahjen e vazhdueshme që po u jep të rinjve të Preshevës. /Telegrafi