Kandidatura e Serbisë në BE varet nga Kosova

Vulat doganore, zhbllokimi i anëtarësimit të Kosovës në institucionet ndërkombëtare dhe pjesëmarrja e zyrtarëve kosovarë në takimet rajonale, janë çështje që Serbia duhet t’i zgjidhë deri më 10 shtator nëse do të fitojë statusin e kandidatit për anëtarësim në Bashkimin Evropian.
Ky është afati i fundit për Beogradin - nëse dëshiron kandidaturën në dhjetor - që t’i adresojë disa çështje në lidhje me Kosovën, thotë raportuesi i Parlamentit Evropian për Serbinë, Jelko Kacin.

“Qeveria e Serbisë ka rastin që t’i thotë Bashkimit Evropian se ka ndaluar me bllokimin e Kosovës në institucionet ndërkombëtare. Në anën tjetër, t’i thotë se në dialog me Prishtinën ka zgjidhur çështjen e vulave, meqë ajo është një pengesë e madhe në përparimin e tregtisë ndërmjet Kosovës dhe ekonomive në rajon, por edhe një gjenerator i krimit të organizuar dhe korrupsionit, që, me mospranimin e vulave, i mundëson dhe i përkrah edhe vetë shteti i Serbisë. Këto janë dy sfidat më të mëdha, për të cilat personalisht besoj se Serbia do të japë përgjigje pozitive”, thotë Kacin për Radion Evropa e Lirë.

Këto dy çështje janë pjesë e Planit të Veprimit të Qeverisë së Serbisë, thotë kryetari i Komisionit Parlamentar serb për Integrime Evropiane, Llasllo Varga. “Mendoj se të gjitha vendimet për çështje politike janë të vështira, porse nuk kërkojnë shumë kohë. Nëse ka vullnet politik, këto çështje mund të zgjidhen brenda një muaji”, thotë ai.

Ndërkohë, disa zyrtarë të Qeverisë serbe janë duke e bërë gjithnjë e më të zëshëm mesazhin se Serbia, ndonëse dëshiron Bashkimin Evropian, nuk do të kalojë vijën e kuqe të, siç thuhet, çështjes territoriale. “Askush nuk duhet ta vërë Serbinë në situatën për të zgjedhur Kosovën, ose Evropën”, thonë ata.

Zëvendëskryeministri serb, Ivica Dacic nuk është i vetmi që e ka përmendur mundësinë që Beogradi së shpejti mund të ndodhet para kësaj dileme.

Në pyetjen nëse një gjë e tillë është e vërtetë, Jelko Kacin thotë se Serbia nuk mund të vendosë për Kosovën. “Serbia do të duhej të vendosë për veten e jo për Kosovën”, thotë Kacin.

Javën e ardhshme, kancelarja gjermane do të vizitojë Beogradin. Pritjet janë që Angela Merkel t’iu kërkojë autoriteteve serbe të heqin dorë nga veriu i Kosovës, si kusht për përparim në rrugën evropiane. /Rel/Telegrafi/