Nis procesi i Haradinajt

Në Tribunalin e Hagës ka filluar procesi i rigjykimit ndaj kryetarit të Aleancës për Ardhmërinë e Kosovës, ish-kryeministrit të Kosovës Ramush Haradinajt dhe Lah Brahimaj e Idriz Balaj.
Rigjykimi ka nisur pasi që të njëjtit akuzohen se në periudhën maj deri në fund të korrikut të vitit 1998 kanë kryer krime lufte kundër atyre që në Ushtrinë Çlirimtare të Kosovës i kishin vlerësuar si tradhtar.

Në ditën e parë të rigjykimit, është paraqitur prokurori i rastit i cili edhe është duke vazhduar me paraqitjen e fjalës së tij hyrëse ndërsa gjatë ditës pritet që me fjalë hyrëse të paraqiten edhe mbrojtësit e tre të akuzuarve.

Prokurori i rastit pretendon se të tre të akuzuarit kanë pasur rol kyç në Ushtrinë Çlirimtare dhe si të tillë kanë pasur për qëllim që përveç që zona e Dukagjinit të jetë e lirë nga serbët, e njëjta të jetë e çliruar edhe nga ata të cilët ishin kundër Ushtrisë Çlirimtare.

Për vrasjen e siç thuhet në aktakuzë tradhtarëve, prokurori ka pohuar se ka prova të mjaftueshme. Ai thotë se të cilësuarit tradhtar janë vrarë pavarësisht kombësisë apo religjionit që kishin.

Seanca kryesore e rigjykimit është duke vazhduar ndërsa seancë gjyqësore për këtë rast pritet të ketë edhe gjatë ditës së premte. /Zëri/Telegrafi/