Procesi i shpronësimit përcillet me probleme

Prishtinë, 6 shkurt - Shpronësimi i pronave në disa rrugë magjistrale të vendit, përveç se po pengon vazhdimin e punimeve, po shqetëson tej mase pronarët, të cilët nuk e dinë se cili do të jetë fati i tyre, raporton KTV. Familjes Haliti tash e tre vjet ende nuk i është kompensuar një hektar tokë, i shfrytëzuar nga Ministria e Transportit për ndërtimin e urës në magjistralen Prishtinë – Pejë. Kjo familje po qëndron pezull, derisa nuk e di se cili do të jetë fati i pronës së tyre. Nga ana tjetër, zyrtarë të Departamentit të Tatimit në Pronë në Ministrinë e Ekonomisë kanë premtuar se vlerësimi i pronave do të fillojë të bëhet brenda 20 ditësh. Ndërsa, i gjithë vlerësimi i pronave do të bëhet në bazë të ligjit për shpronësim.