Reagon AKSH e vërtet?

Pas botimit në media të komunikatës së lëshuar nga e ashtuquajtura Forcat e Armatosura të Shqipërisë Etnik (FASHE), që sipas zëdhënësit të saj politik, kolonel Sazan Toplica paraqet bashkimin Armatës Kombëtare Shqiptare (AKSH) dhe Sigurimit Kombëtar Shqiptar (SKSH), në media pason një reagim që thuhet se vjen nga Fronti i Bashkimit Kombëtar Shqiptar (FBKSH). Sipas komunikatës së FBKSH, kërcënimi i FASHE është “budallallëk i llojit të vet” që vjen “vjen prej ndonjë grupi tradhtarësh të çështjes kombëtare shqiptare”.

Sipas komunikatës, që tashti thuhet se vjen nga AKSH-ja e vërtet, FASHE përpiqen ta mashtrojnë opinionin e gjerë, për të “krijuar benifite financiare nga shtresa të ndryshme njerëzish atdhetar”.

“Kuvendi i III i Himarës i 24 Prillit 2010, pos tjerash ka nxjerrë vendime meritore që ende janë në fuqi”, thuhet në komunikatë. “AKSH-ja nuk vepron në Zonën nr. 02 Kosova Historike si dhe në Zonën nr. 01 Shqipëria Londineze. Prandaj FBKSH-ja dhe strukturat e saja distancohen nga ‘komunikata nr. 2 e FASHE’ ku në gojë zënë edhe ‘tre germshin’ AKSH”.

Sipas komunikatës, Kuvendi i Himarës njerëzve që u deklaruan si FASHE “ua tregoi fytyrën e vërtetë, duke i cilësuar dhe emëruar si dashakëqij të çështjes kombëtare shqiptare”.

“Nga njerëz të tillë kombi nuk pret diçka më e mirë. Ata janë të dështuar politikisht e kombëtarisht. Konsiderojmë se vërtetë ka ardhur koha që AKSH të veproi sipas kodit të mirësjelljes ndaj këtyre njerëzve të pa përgjegjshëm e faqe zi”, thuhet në fund të komunikatës së nënshkruar nga emrat Albanik Shala (udhëheqës politik i zonës nr.2) dhe Arbër Kastrioti (kryetar i FBKSH) /Telegrafi/