Reagon Zagrebi

Sekretari shtetëror për çështje politike në ministrinë e Jashtme të Kroacisë, Mario Nobilo, i ka shprehur pakënaqësi ambasadorit serb në Zagreb, Stanimir Vukicevic, për shkak të deklaratave të papranueshme dhe fyese të presidentit Boris Tadic dhe shefit të diplomacisë serbe, Vuk Jeremic.

Siç ka deklaruar të shtunën ministria e Jashtme kroate, Vukicevicit i është thënë se Kroacia e ka pranuar Kosovën si shtet të pavarur, me të cilën – si me të gjitha shtetet tjera të Evropës juglindore, përfshirë Serbinë – zhvillon raporte miqësore me parimet e respektimit të sovranitetit dhe integritetit territorial, që sipas frymës evropiane kontribuojnë në stabilitetin dhe sigurinë në rajon.

ë njoftimin të cilin e transmeton “Beta” thuhet se Kroacia angazhohet për mbrojtje të të drejtat e njerëzve dhe të pakicave në Kosovë dhe për fillimin e dialogut mes Prishtinës dhe Beogradit.

Duke komentuar deklaratat e kryeministres kroate Jadranka Kosor në Prishtinë, se Kroacia është miku më i madh i Kosovës në rajon, shef i diplomacisë serbe, Vuk Jeremic, nga Banjalluka ka thënë se “kush e ka Jadranka Kosoren miken më të mirë, armiqtë atij nuk i duhen”.

Ndërsa, për shkak të vizitës së saj në Kosovë, presidenti serb Boris Tadic ka thënë se “sjellja e saj joevropiane dhe vizita në Kosovë nuk mund të kontribuojnë në përparimin e raporteve të Serbisë me Kroacinë”.

Për shkak të pakënaqësisë së tij me kryeministren Kosor, Tadic ka anuluar edhe qëndrimin e planifikuar në Dubrovnik, me ftesën e kryetarit të Kroacisë Ivo Josipovic, për të dëgjuar koncertin e Filarmonisë së Beogradit.

Siç citon “Blic”, gjatë bisedës me Josipovicin Tadic kishte thënë se “nuk mund të shkojë në Dubrovnik pas gjithë asaj që kishte thënë Kosor”. /Telegrafi/