Mesazhi i qartë për Serbinë

Mesazh i qartë dhe i fuqishëm, është vlerësuar nga analistët për integrimet evropiane deklarata e kancelares gjermane Angela Merkel se parakusht për anëtarësimin e Serbisë në BE është Kosova.

Merkel ka thënë se në BE e duan integrimin e Ballkanit Perëndimor, por pasi që shtetet të zgjidhin problemet mes vete.

“Për këtë duhet të përmbushet një parakusht, e një nga parakushtet për anëtarësimin e Serbisë në Bashkimin Evropian është Kosova. Dëshirojmë që marrëdhëniet në mes këtyre dy shteteve të normalizohen ngadalë dhe që të normalizohet jeta. Nuk mund të kemi në Bashkimin Evropian vende që kur njëra vjen në tavolinë, tjera ngrihet dhe largohet. Kjo është e pamundur”, ka thënë Merkel.

Ky mesazh për analisten e Iniciativës Evropiane për Stabilitet, Verena Knaus, është ndër mesazhet më të qarta që një lider i Bashkimit Evropian i ka dërguar Serbisë në lidhje me Kosovën.

Sipas saj, kjo siguron kosovarët që Serbia nuk do të hyjë në BE pa zgjidhur çështjen me Kosovën, dhe rrjedhimisht nuk do të mund t’i shkaktojë pengesa rrugës evropiane të shtetit të ri.

“Kjo për Serbinë nënkupton se ajo duhet ta kuptojë se Kosova nuk qeveriset nga Serbia, se është shtet i veçantë i njohur nga 22 shtete të BE-së, ndërsa për Kosovën që ta kuptojë se Serbia është një fqinj dhe se duhet të merret me këtë”, tha Knaus për “Radio Evropa e Lirë”.

Ajo thotë se për shkak të mosnjohjes së Kosovës nga 5 shtetet anëtare, BE-ja në sytë e vendeve të Ballkanit del me një pozicion jo të fuqishëm. Ndaj, Gjermania duhet të marrë një rol udhëheqës, për të gjetur konsensusin për Kosovën brenda bllokut 27 anëtarësh.

“Gjermania duhet të marrë rolin udhëheqës brenda BE-së, me ndihmën e Britanisë së Madhe, Francës e Italisë, që e kanë njohur Kosovën, dhe të fillojë një dialog të brendshëm të BE-së, që duhet të vazhdojë krahas dialogut Prishtinë-Beograd. Ky dialog do të duhej të kërkonte zgjidhjen për Kosovën dhe të gjendej një modus që këto 5 shtete ta njohin Kosovën”.