PD për edukatën fetare, Ipeshkvia kundër

I shqetësuar nga mosimplementimi i programit të Partisë së Drejtësisë në Qeveri, nënkryetari Amir Ahmeti ftoi në një mbledhje kryetarët e degëve të PD-së nga Prishtina, Prizreni, Podujeva, Rahoveci, Lypjani, Drenasi, Fushë-Kosova dhe Kamenica.

Në takim u kërkua nga kryetari Ferid Agani dhe deputetët e PD-së në Parlament që të marrin hapat e domosdoshëm për të implementuar programin e PD-së, sidomos pikat që kanë bëjnë me edukatën fetare në shkollat e mesme dhe fillore, si dhe anulimin e paragrafit të Udhëzimit Administrativ të MASHT-it që ndalon vijimin e shkollimit të vajzave me mbulesë.

Ndryshe, Ahmeti bashkë me dy deputetë të tjerë të PD-së ka kërcënuar ditë më parë se do të tërhiqet nga Grupi parlamentar i Aleancës Kosova e Re në rast se në Kuvend nuk kalon projektligji për zbatimin e lëndës së Edukatës Fetare në shkollat publike.

Përkitazi me këtë ide - në lidhje me mundësinë e amandamentimit të ligjit për arsim parauniversitar - Ipeshkvia e Kosovës përmes një komunikatë për shtyp thotë se paraprakisht duhet të bëhen disa hapa, ku vend të rëndësishëm është njohja e shtetësisë së Kosovës nga të gjitha institucionet, arsimimi i mirëfilltë evropian, krijimi i Komisionit me përfaqësuesit e të gjitha bashkësive fetare, si dhe vendimi unik i kombit për këtë çështje.

“Ipeshkvia e Kosovës konsideron se në këto rrethana duhet të hiqet nga rendi i ditës ky propozim... Në të kundërtën, Kisha Katolike në Kosovë do të konsiderojë këtë vendim të njëanshëm dhe nuk do të bartë përgjegjësinë mbi pasojat e mundshme për kombin”. /Telegrafi/