Gratë intelektuale: Në Kosovë garantohen të gjitha liritë fetare

Gratë intelektuale dhe aktivistet për të Drejtat e Grave të Kosovës i kanë dërguar një letër peticion Kryetarit te Kuvendit, Jakup Krasniqi dhe gjithë deputetëve të Kuvendit lidhur me kërkesën për amandamentet si një formë e ndërhyrjes se fesë nëpër shkolla.

“Në bazë të informacionit të publikuar në media, jemi njoftuar se janë bërë dy propozim amendamente të mbështetura nga 27 deputetë të Kuvendit të Kosovës, për modifikimin e nenit 3, paragrafi 7 të Ligjit për Arsimin Parauniversitar, si dhe për shtimin e një paragrafi të ri në nenin 3 të këtij ligji, thuhet në fillim të këtij peticioni. Këto dy propozim-amendamente janë të karakterit fetar dhe synojnë legalizimin e përdorimit të shamive në shkolla si dhe futjen e lëndës së Edukatës Fetare dhe Morale në planprogramet mësimore”, thuhet në letër.

“Duke u nisur nga fakti se Kosova është shtet laik i definuar me kushtetutë si dhe duke marrë parasysh se kombi shqiptar me tri religjione është mbajtur unik duke i dhënë rëndësi kombit para fesë, ne intelektualet dhe aktivistet për të drejtat e grave kërkojmë nga ju si përfaqësues të popullit që t`i mbroni me vendosmëri vlerat shtetërore dhe kombëtare duke votuar kundër amendamenteve të propozuara”, vazhdon letër-peticioni.

Për më tepër, ato konsiderojnë se legjislacioni në fuqi i Republikës se Kosovës garanton te gjitha liritë fetare sipas standardeve evropiane, prandaj nuk ka nevojë të ndryshohet.

“Mbetemi të bindura se Kuvendi i Kosovës do të dalë në mbrojtje të vlerave tona shtetërore, kombëtare e demokratike, ashtu siç i kemi mbrojtur edhe në sfida më të rënda”, theksohet më tej. /Telegrafi/