Gratë përforcojnë demokracinë

Presidentja e Republikës së Kosovës, Atifete Jahjaga, e cila po
qëndron për vizitë zyrtare në Lituani, për të marrë pjesë në konferencën
“Gratë përforcojnë demokracinë: praktikat më të mira”, pati të martën
një takim zyrtar me shefen për çështjet globale të grave në
Departamentin Amerikan të Shtetit, ambasadoren Melanne Verveer.Verveer
theksoi parimin se asnjë vend nuk mund të ketë zhvillim nëse nuk ka
zhvillim të pozitës së femrës dhe nëse femra nuk e luan rolin e saj të
barabartë në shoqëri, duke theksuar rolin e femrës në botë dhe në
veçanti rolin e saj në zhvillimin ekonomik e social të shoqërisë.
Ajo tha se shembulli i zgjedhjes së Presidentes së Kosovës do të
duhej të shërbente edhe për institucionet e tjera të vendeve ku femrat
duhet të kenë përfaqësim dhe rol më të madh në lidership.
Ndërsa presidentja Jahjaga tha se ndihma e SHBA për Kosovën ka qenë
dhe mbetet e pazëvendësueshme dhe ajo vazhdon të jetë qenësore, sepse
sipas saj Kosova ka vullnet, ka njerëz të përkushtuar, ka potenciale për
të ecur përpara, duke pasur një popullatë shumë të re dhe të orientuar
fuqishëm për integrimet euroatlantike.
Duke theksuar se zëri i femrës udhëheqëse në Kosovë është i
rëndësishëm, Jahjaga nënvizoi se është me rëndësi rritja e rolit të
femrës edhe në gjithë rajonin. Në këtë plan, presidentja Jahjaga theksoi
idenë e organizimit të një konference ndërkombëtare të grave lidere të
rajonit dhe të vendeve në zhvillim, e cila në fillim të vitit të
ardhshëm do të mbahej në Prishtinë, si formë e një bashkëpunimi konkret e
të përhershëm. /Telegrafi/