Agani: Fajet i ka Sekretari i përhershëm

Njerëzit mendojnë t’i realizojnë qëllimet e tyre, duke emëruar persona në pozita të larta në sektorin shëndetësor, ka thënë Ministri i Shëndetësisë, Ferid Agani.

Për raportet me Sekretarin permanent të Ministrisë, Ilir Tolajn, ministri thotë se nuk janë të këqija, por megjithatë reflektojnë në pakënaqësinë e ministrit se pse administrata shtetërore e shëndetësisë nuk është në gjendje të kryejë detyrat që janë kompetencë e saj.

“Konkretisht bëhet fjalë për emërimin e disa personave në pozita të larta drejtuese, siç është ajo me drejtorin ekzekutiv të QKU-së, pastaj kryeinspektorin shëndetësor në MSH, po ashtu edhe AKPM...”, ka thënë Agani në një intervistë për “Expres”.

Duke pasur parasysh kërkesën e kryeministrit që të bëhet ripërtëritja e të gjithë sekretarëve permanentë në të gjitha ministritë, Agani nuk ka kërkuar shkarkimin e Tolajt, por ka kërkuar nga KELP-i që të deklarohet lidhur me validitetin e kontratës së punës të tij - që të nisë ose jo me hapjen e konkursit.

Në QKU nuk ka drejtor, klinikat janë me Ushtrues Detyre, AKPM-ja pa kryeshef ekzekutiv, ndërsa nuk ka kryeinspektor shëndetësor në MSH. Për Aganin, fajtor për këtë është zyra e sekretarit të përhershëm.

“Po, normalisht, zyra e sekretarit permanent... Sektori i shëndetësisë ka qenë i politizuar në masë të skajshme, ka interesa të mëdha politike, të grupeve të caktuara dhe individëve të cilët tentojnë që duke pozicionuar njerëz në pozita, në institucione me rëndësi, t’i realizojnë interesat e ndryshme të tyre”, ka thënë Agani.

“Jam i vendosur që gjërat të vihen në binarin ligjor, por shumë qartë po shihet se ka vështirësi të mëdha në këtë proces. Nuk është lehtë që të humben territoret që dikush i ka konsideruar të fituara dhe në zotërim”. /Telegrafi/