Danke Merkel

Kancelarja gjermane Angela Merkel e ka bërë detyrë personale shtyrjen përpara të tri kërkesave të saj shtuar zyrtarëve serbë gjatë vizitës në Beograd, sidomos për shpërbërjen e strukturave paralele.

Shteti gjerman është duke bërë presion të madh që ta përkrahin edhe vendet e tjera të BE-së dhe jashtë saj. Burime vendore dhe ndërkombëtare kanë thënë për “Zërit” se rezultatet e këtij presioni pritet të shihen gjatë mbledhjes së Këshillit të Sigurimit të OKB-së, që mbahet sot në New York.

Përpjekjet e Merkelit duket se e kanë trembur jo pak edhe shefin e diplomacisë së Serbisë, Vuk Jeremic, i cili ka pranuar se takimi i 29 gushtit “pritet të jetë i vështirë për Serbinë”.

Njoftimi zyrtar i MPJ-së së Kosovës tregon se vendi ynë do t’iu bashkohet vendeve si Gjermania që të bëjë “kërkesë zyrtare për shpërbërjen e strukturave paralele ilegale-shtetërore në Kosovë dhe të heqë dorë nga mbështetja politike për grupe të krimit të organizuar në veri”.

Burimet diplomatike që kanë folur jozyrtarisht për “Zëri ”, kanë thënë se kërkesat e ministrit Hoxhaj dhe të palës kosovare në përgjithësi, për zhbërjen e këtyre strukturave, tash vonë janë kuptuar se janë pjesë e problemit real.
Për këtë arsye Gjermania së fundi ka shtuar presionet që atyre strukturave t’iu jepet fund. /Telegrafi/