Marrëveshje me shumë të panjohura

Edhe dy marrëveshje me shumë të panjohura, pa nënshkrime, pa afate dhe me shumë “pa...” të tjera, arrihen në dialogun Kosovë-Serbi. Të dyja palët sërish lanë shumë pyetje e dilema pa përgjigje, e që kanë të bëjnë me përmbajtjen, zbatimin, afatet, garantuesin dhe zbatuesit e këtyre marrëveshjeve.

Përderisa nga qeveria detajet e këtyre marrëveshjeve nuk janë komentuar e as sqaruar, burime ndërkombëtare thonë se palët zakonisht nuk i dinë të gjitha detajet, pasi që ato kryesisht merren vesh për parimet, kurse detajet i përcakton Zyra e Robert Cooperit, shkruan gazeta Zëri.

Sipas këtyre burimeve, marrë si shembull marrëveshjen për vulat, aty marrëveshja vetëm sqaron se Serbia njeh vulën e Doganave të Kosovës, kurse Kosova pajtohet të heqë masat e reciprocitetit, kurse detajet tjera, thuhet se i finalizon Cooper.

I njëjti burim thotë se marrëveshja do të mbështetet kryesisht te parimet e CEFTA-s, por ai nuk di as vetë se si ta shpjegojë faktin se a i njeh apo jo Serbia edhe certifikatat e origjinës dhe dokumentet përcjellëse, pasi që kalimi i mallrave mes shteteve nuk ka vetëm procedurën e një vule. /Telegrafi/