Guinea-Bissau rikonfirmon njohjen e Kosovës

Zv/kryeministri Behgjet Pacolli, i cili ndodhet në një turne lobues në Afrikë, ka pasur të enjten një bisedë telefonike me presidentin e Republikës së Guinea-Bissau, Malam Bacai Sanha, i cili i ka rikonfirmuar atij se institucionet e këtij shteti e kanë proceduar deri në fund procesin e njohjes së Pavarësisë së Kosovës.

Deklarimet e fundit të zyrtarëve dhe mediave të Beogradit për kinse tërheqjen e njohjes së pavarësisë së Kosovës apo ndalimin e procedimit të njohjes nga Guinea-Bissau, zv/kryeministri i parë Pacolli i vlerëson si shpifje të ulëta dhe jodiplomatike.

Gjatë bisedës së zhvilluar me presidentin Sanha, Pacolli ka marrë garanci për mbështetje të pa rezervë për institucionet e Republikës së Kosovës nga Republika e Guinea Bissau, njofton Zyra për informim e zv/kryeministrit Pacolli.

Presidenti i Guinea Bissau, i ka quajtur dezinformata spekulimet e mediave serbe për tërheqje të njohjes nga Republika e Guinea Bissau, thuhet më tej në komunikatë. Ai ka thënë se vendi i tij e ka njohur Kosovën në përputhshmëri me vullnetin e popullit dhe institucioneve të Republikës së Guinea Bissau. /Telegrafi/